Փետրվարի 5-ին, ժամը 23.45-ին, Արմավիրի շտապօգնության կայանից հաղորդում էր ստացվել, որ Արմավիր քաղաքի Բաղրամյան փողոցի 7-րդ շենքում 64-ամյա տղամարդու դիակ կա։Ահազանգով մեկնած համայնքային ոստիկանները պարզել էին, որ 64-ամյա տղամարդը, նախնական տվյալներով, հանկարծամահ էր եղել։

Փաստի առթիվ Արմավիրի մարզային քննչական վարչությունում նախաձեռնվել էր քրեական վարույթ։

Ոստիկանության Արմավիրի մարզային վարչության և Արմավիրի բաժնի ծառայողների համատեղ ձեռնարկած օպերատիվ-հետախուզական ծավալուն միջոցառումների արդյունքում պարզվել է, որ 64-ամյա տղամարդը փետրվարի 5-ի ժամը 22.00-ի սահմաններում Բաղրամյան փողոցիխանութում դրսևորել էր ոչ պատշաճ վարքագիծ։ Խանութի տիրոջ 21-ամյա որդին տեղեկանալով այդ մասին՝64-ամյա տղամարդուն դուրս էր հանել խանութից, ապա ձեռքերով և ոտքերով խփել։ Այնուհետև նրա հայրը 64-ամյա տղամարդուն տարել էր իրենց տուն, որտեղ էլ նա մահացել էր։ Հետագա միջոցառումներով տեղեկություններ ստացվեցին, որ մահացածի հագուստը գցել էին աղբարկղը։

Դեպքի առթիվ տարածքային քննչական մարմնում սպանության հատկանիշներով նախաձեռնվել էր քրեական վարույթ: Փետրվարի 14-ին երիտասարդի նկատմամբ հայտարարվել էր հետախուզում։

Բացատրական աշխատանքի արդյունքում 21-ամյա երիտասարդը փետրվարի 20-ին ներկայացել է ոստիկանության Արմավիրի բաժին, ապա տեղափոխվել Արմավիրի մարզային քննչական վարչություն։

Նախաքննությունը շարունակվում է։