Այս տարվա հունիսի 2-ին, երբ տեղի ունեցավ Տրանսպորտային եւ տնտեսական կապերի ապաշրջափակման հարցով եռակողմ աշխատանքային խմբի վերջին հանդիպումը, կողմերը զգալի առաջընթաց արձանագրեցին տրանսպորտային հաղորդակցությունների ապաշրջափակման գործընթացի ուղղությամբ։ Այս մասին հայտարարել է ՌԴ փոխարտգործնախարար Միխայիլ Գալուզինը։

«Բայց մենք կարծում ենք, որ Հայաստանի և Ադրբեջանի միջև տրանսպորտային հաղորդակցությունների ապաշրջափակումը, մասնավորապես Մեղրիի երթուղու ստեղծումը, որը Ադրբեջանի հիմնական տարածքը կկապի Նախիջևանի հետ... Ի վերջո, խոսքը Հայաստանի տարածքով անցնող երկաթուղու մասին է, ուստի ես ազատություն եմ վերցրել օգտագործել Մեղրի երթուղի անունը։ Այո, Ադրբեջանում այն ​​կոչվում է Զանգեզուրի միջանցք»,-նշել է փոխարտգործնախարարը։

Ըստ նրա՝ այդ համաձայնագիրը շատ կարևոր գործոն կլինի Հարավային Կովկասի ընդհանուր կայունացման համար։

«Դա կնպաստի տարածաշրջանի բոլոր պետությունների տնտեսական զարգացմանը, քանի որ այս դեպքում Հայաստանը հնարավորություն կունենա դառնալ տրանսպորտային և լոգիստիկ հանգույց, ամրապնդել և ընդլայնել իր տրանսպորտային կապերը Ադրբեջանի, Թուրքիայի և Ռուսաստանի հետ։ Ադրբեջանը հնարավորություն կունենա անխափան ռիթմիկ տրանսպորտային կապերունենալ երկրի երկու հատվածների միջև։ Իսկ իրավիճակի ընդհանուր կայունացումը կծառայի Հայաստանի և Ադրբեջանի միջև վստահության հիմքերի ամրապնդմանը։ Այսպիսով, մենք հաստատակամ ենք շարունակելու խթանել այդ խորհրդակցությունները եռակողմ աշխատանքային խմբի շրջանակներում»,-ասել է Գալուզինը: