2023 թվականի հոկտեմբերի 8-ին Մայր Աթոռ Սուրբ Էջմիածնում, Սուրբ Տրդատի բաց խորանում տեղի ունեցած եպիսկոպոսական ձեռնադրության և օծման արարողությանը  Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի ձեռամբ, ի թիվս այլ վարդապետների,  եպիսկոպոսության աստիճանի արժանացավ նաև Վիրահայոց թեմի առաջնորդ Հոգեշնորհ Տ. Կիրակոս վարդապետ Դավթյանը:

Սրբազան արարողությունների առիթով Սուրբ Էջմիածին էին ժամանել Հայ Եկեղեցու թեմակալ առաջնորդներ, ներկայացուցիչներ Երուսաղեմի Հայոց Պատրիարքությունից, Մայր Աթոռի բարերարներ, ուխտավորներ Հայաստանից, ԱՄՆ Հայոց Արևելյան, Իրաքի և Վրաստանի թեմերից:

Մայր Աթոռում կայացած եպիսկոպոսական ձեռնադրությանը ներկա էր  Վրաց Ուղղափառ Սուրբ Եկեղեցու Սուրբ Սինոդի անդամ, Ախալքալաքի, Կումուրդոյի և Կարիի միտրոպոլիտ Նիկոլոզ Փաչուաշվիլին: 

Սրբազան արարողությանը  մասնակցեցին  Վիրահայոց թեմի Սամցխե-Ջավախքի և Ծալկայի ընդհանուր առաջնորդական փոխանորդ Հգշ. Տեր Նշան Վարդապետ Հմայակյանը,  Ախալցիխե քաղաքի հոգևոր հովիվ և Ախալցիխեի ու Բորժոմիի տարածաշրջանների հոգևոր տեսուչ, հգշ. Տ. Հակոբ աբեղա Սահակյանը, «Վրաստան» թերթի խմբագիր Վան Բայբուրթյանը, «Բազմազգ Վրաստան-համընդհանուր շարժում» կազմակերպության ղեկավար Առնոլդ Ստեփանյանը, տարբեր հասարակական, տնտեսական կազմակերպությունների ներկայացուցիչներ Մարի Միկոյանցը, Կարեն Եղիազարյանը, բարերար Արմեն Գևորգյանը, հոգևոր սպասավորներ և աշխարհիկ ծառայողներ, Վրաստանի տարբեր շրջաններից և մայրաքաղաք Թբիլիսիից ժամանած հավատացյալների  խմբեր:

Այդ օրը հիրավի ուրախալի և երջանկաբեր էր վրացահայության համար: Թեմի հոգևոր դասի, աշխարհիկ կազմի  և   հավատացյալների հոծ խումբը ներկա գտնվեց ընծայման, եպիսկոպոսական ձեռնադրության և օծման արարողությանը:

Հավարտ Սրբազան արարողության ներկաները և  վիրահայոց  պատվիրակության  անդամները ջերմագին մաղթանքներով  շնորհավորեցին Վիրահայոց թեմի  առաջնորդ  նորաօծ  Գերաշնորհ Տեր Կիրակոս  եպիսկոպոս Դավթյանին, կիսելով օրվա հուզառատ   ուրախությունը:

 Վիրահայոց թեմի հոգևոր դասի, սարկավագների, աշխարհիկ աշխատակազմի, հազարավոր  հավատացյալների և եկեղեցասերների անունից շնորհավորում ենք Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանին և   մաղթում Քրիստոնյա հավատքին և Հայ Առաքելական Սուրբ Եկեղեցուն նվիրական ծառայություն,  Վիրահայոց թեմի գործունեության խորացում,ամրապնդում և թեմի շուրջ վրացահայության համախմբում: