Չէր կարող Արցախի շահերը ՀՀ-ի շահերից գերակա լինել, և ողբերգական իրադարձությունների շարքը դա ապացուցեց. Factor TV-ին տված հարցազրույցում ասել է ԱԺ «Քաղաքացիական պայմանագիր» խմբակցության պատգամավոր Գուրգեն Արսենյանը։

«Աղետի պարագայում մենք ունեցանք մի պետական համակարգ, որը աղետի հետևանքների մինիմալիզացիայով է զբաղվում», - ասել է նա։

Գուրգեն Արսենյանը նշել է, որ  ՀՀ քաղաքական և պետական այրերը պետք է աշխատեն՝ սպասարկելով ՀՀ-ի պետական շահերը. «Ես իմ գործունեության ընթացքում չեմ գնացել մի ճանապարհով, որը ոտնահարի ՀՀ պետական շահերը, դրա համար ես չեմ զգում որևէ մեղքի բաժին»։

Գուրգեն Արսենյանը հայտարարել է, թե «պետք է պարզել՝ ում էր պետք պանիկա տարածել, որ Արցախի 100 000 քաղաքացիները սրընթաց արտագաղթեն»։

«Սրընթաց արտագաղթի պանիկան տարածել են տեղական իշխանությունների ներկայացուցիչները», - ասել է նա և պնդել, որ դա տեղեկություն է և ոչ թե ենթադրություն։  

«Բազմաթիվ մարդիկ ՀՀ-ում հայտնվել են այն վիճակում, որ փոխնորդ շոր չունեն, իրենց ասել են հենց հիմա գնացեք», - ասաց նա և նշեց, որ սրընթաց հոսքը նպատակ ուներ պետական համակարգի պարալիզացիայի։