Ադրբեջանի և Հայաստանի արտգործնախարարները Թեհրանում բանակցություններ են վարել։

Ինչպես հաղորդում է ադրբեջանական ԱՊԱ գործակալությունը, այս մասին հայտարարել է Իրանի արտաքին գործերի նախարար Հոսեյն Ամիր Աբդուլլահիանը «3+3» տարածաշրջանային հարթակի արտաքին գործերի ղեկավարների հանդիպումից հետո մամուլի հայտարարության մեջ։

Աբդուլլահիանն ասել է, որ Թեհրանում կայացած «3+3» հանդիպման շրջանակներում Արարատ Միրզոյանի և Ջեյհուն Բայրամովի հանդիպումը գործնական քայլ է Ադրբեջանի և Հայաստանի միջև խաղաղության և բարեկամության համար։

Նա նշել է, որ նշված հանդիպման շրջանակներում Ադրբեջանի և Հայաստանի արտգործնախարարները զրուցելու հնարավորություն են ունեցել։

Աբդուլլահիանի խոսքով, այս հանդիպումը կնպաստի Հարավային Կովկասի տարածաշրջանում կայունության և անվտանգության հաստատմանը։

«Հայաստանը ճանաչում է Ղարաբաղը որպես Ադրբեջանի տարածք։ Ադրբեջանը երաշխավորում է Ղարաբաղում ապրող հայերի անվտանգությունը»,- հավելել է նախարարը։