Քննչական կոմիտեն հայտնել էր, որ ավարտվել է Արմավիրի մարզի Փարաքար համայնքի Թաիրով բնակավայրում գործող գիշերային ակումբում տեղի ունեցած խուլիգանության դեպքի առթիվ նախաձեռնված քրեական վարույթի նախաքննությունը, մեղադրանք է ներկայացվել երկու անձի։

Hayastan.news-ի տեղեկություններով՝ մեղադրյալներից մեկը՝ Փարաքար համայնքի 36-ամյա բնակիչը, համայնքի ղեկավար Դավիթ Մինասյանն է։

Ըստ նախաքննության նյութերի՝ 2023թ. ապրիլի 23-ին՝ ժամը 02-00-ի սահմաններում, Արմավիրի մարզի Փարաքար համայնքի 36-ամյա բնակիչը, մտերիմների՝ նույն համայնքի 33-ամյա բնակչի և մի խումբ անձանց հետ, գտնվելով նույն համայնքի Թաիրով բնակավայրում գործող գիշերային ակումբում, ոգելից խմիչքի ազդեցության տակ, ակումբի սրահից դուրս է հրավիրել հաճախորդներից մեկի հետ նույն սեղանի շուրջ նստած մի կնոջ, ինչին հիշյալ հաճախորդը հակադրվել է: Փարաքար համայնքի 36-ամյա բնակիչը, չհամակերպվելով նշված փաստի հետ, պարզաբանումներ պահանջելու նպատակով ակումբի նախասրահ է հրավիրել հիշյալ հաճախորդին և վերջինիս հետ գտնվող անձանց: Բացահայտ արհամարական վերաբերմունք ցույց տալով ակումբում գտնվող անձանց նկատմամբ և իր թվացյալ առավելությունն ընդգծելու նպատակով՝ 36-ամյա տղամարդը ակումբի նախասրահում անհարկի բարձրաձայն հայհոյանքներ հնչեցնելով, ձեռքին առկա ապակյա բաժակը հարվածել է ակումբի նախասրահի պատին ամրացված հայելուն: Հետևելով վերջինիս՝ նրա 33-ամյա ընկերը ևս ձեռքին առկա ապակյա բաժակը հարվածել է նույն հայելուն և դուրս են եկել ակումբից։

Ակումբի դիմաց ավտոմեքենայի ճանապարհը փակելու չնչին առիթով 36-ամյա տղամարդը վիճաբանության մեջ է մտել ինքնությունը չպարզված անձի հետ, կանգնեցրել է նրան, և տևական ժամանակ խոչընդոտելով ճանապարհի երթևեկությունը, քաշքշելով փորձել է ավտոմեքենայից դուրս հանել վարորդին, իսկ 33-ամյա ընկերը ոտքերով հարվածներ է հասցրել հիշյալ ավտոմեքենային:

Ձեռք բերված բավարար փաստերի հիման վրա Փարաքար համայնքի 36 և 33-ամյա բնակիչներին մեղադրանք է ներկայացվել ՀՀ քրեական օրենսգրքի 297-րդ հոդվածի 2-րդ մասի 2-րդ կետով՝ խուլիգանություն՝ անօգնական վիճակում գտնվողի նկատմամբ