Գերմանական Bild-ը հետաքրքիր անդրադարձ է արել ուկրաինական պատերազմական իրավիճակին։ Լրատվամիջոցը գրում է, որ սկսվել է հերթական ձմեռը․ ուկրաինացի զինվորները տառապում են ոչ միայն կատաղի մարտերից, աճող ցրտից ու ծայրահեղ սովից, այլև հիմա նրանց պատուհասել է իսկական ժանտախտը։ Եվ կատուները առաքելություն ունեն պատերազմում:

Այնտեղ, որտեղ ուկրաինական բանակի զինվորները փնտրում են պաշտպանություն, որտեղ նրանք ցանկանում են կարճատև հանգստանալ և մի փոքր քնել, այժմ ավելի ու ավելի շատ անկոչ հյուրեր են բնակություն հաստատում։ Սոցցանցերի տարբեր տեսանյութերում Զելենսկու մարտիկները ցույց են տալիս, թե ինչպես են մկներն ու առնետները, անգամ օձերը, շրջում խրամատներով, հատկապես երկրի հարավային շրջաններում: Խնդիր, որի հետ, իհարկե, կբախվեն նաև ռուս զինվորները։

Տարածված տեսանյութերից մեկում երևում է ուկրաինացի զինվորը և երկու խոշոր օձ։ Տղամարդը կատակում է, որ ընկերոջ կինն ու սկեսուրը եկել են հյուր։ Մեկ այլ տեսանյութում զինվորը դժգոհում է իր ներքնակի տակ թաքնված մի քանի մկներից, մեկ այլ զինվոր բացում է իր պայուսակը, մկները սլանում են բոլոր ուղղություններով:

Բանակում կրծողները լուրջ խնդիրներ են առաջացնում։ Նրանք խանգարում են զինվորների քունը, կրծում նրանց քնապարկերը և ուտում այն, ինչին հասնում են, նույնիսկ՝ զորքերի տեխնիկան։ Զինվոր Եվհեն Իևլևը ուկրաինական հեռուստատեսությամբ հայտնել է պայմանների մասին. «Երբ արթնանում ես, միշտ բռնում ես երկու-երեք մուկ, որոնք սողացել են քո քնապարկի մեջ: Առանձնապես հաճելի չէ, երբ մատդ ծամում են»։

Մկները ոչնչացնում են սաղավարտները և ոչնչացնում կապի կարևոր մալուխները։ Կիևի բարերից մեկը նույնիսկ նվիրատվություններ է խնդրում կրծողների ժանտախտի դեմ պայքարելու համար՝ Instagram-ի գրառման մեջ գրելով. «Դա տարօրինակ, բայց բացարձակապես անհրաժեշտ դրամահավաք է: Մկներն ու առնետները Աստծո արարածներն են: Նրանք գեղեցիկ են, խելացի, առնվազն ոչ հիմար, բայց դավաճան։ Եվ եթե չլինեին անիծյալ ռուսները, մենք ստիպված չէինք սպանել կրծողներին»։

Բարը ցանկանում է օգտագործել հավաքագրված նվիրատվությունները՝ թակարդներ գտնելու և դրանք առաջնագիծ ուղարկելու համար, որպեսզի ձերբազատվեն անհանգստացնող կրծողներից: Այդ ընթացքում ուկրաինացի շատ զինվորներ այլ լուծում են գտել. նրանք կատուներ են տարել ռազմաճակատ․ նրանցից ոմանց պատերազմ են տարել հենց զինվորները: