Կառավարության կայքի «Մեկ անձից կատարվող գնումներ» բաժնում զետեղված պայմանագրերից մեկով ՀՀ Կոռուպցիայի կանխարգելման հանձնաժողովը ծառայությունների մատուցման պայմանագիր է կնքել «Տերազզա Պարկ» ՍՊԸ-ի հետ, որին պատկանում Իսահակյան փողոցում գործող «Terazza» ռեստորանը։ Պայմանագրի արժեքը կազմում է ընդամենը 17,600 դրամ։ Պայմանագրում որպես ծառայության մատուցման տեսակ նշված է՝ ճաշի կազմակերպում համաձայն ճաշացանկի, 1 հատ, այսինքն՝ մեկ բաժին։ Պայմանագիրը կնքվել է 2023 թ․ փետրվարի 1-ին, ծառայությունը մատոՒցվել է հունվարի 31-ին։

Hayastan.news-ը Կոռուպցիայի կանխարգելման հանձնաժողովի նախագահ Հայկուհի Հարությունյանից հետաքրքրվեց, թե ի՞նչ առիթով է այդ պայմանագիրը կնքվել, ո՞վ է օգտվել այդ ճաշի սեղանից։ Հարությունյանն ասաց, թե միջազգային հյուրեր են ունեցել՝ Եվրոպացի փորձագետներ, որոնց հրավիրել էին ճաշի և ընդամենը ծանոթացել նրանց հետ ճաշի սեղանի շուրջ։ Հարցին՝ ընդամենը 17,600 դրամի՞ հաշիվ է եղել, Հայկուհի Հարությունյանն ասաց․ «Ինչո՞ւ, չի՞ կարելի, նորմալ է»։