ՌԴ նախագահ Վլադիմիր Պուտինը ցավակցական հեռագիր է հղել Իրանի գերագույն առաջնորդ Սեյեդ Ալի Խամենեիին և Իրանի նախագահ Սեյեդ Էբրահիմ Ռաիսիին՝  Քերման քաղաքում տեղի ունեցած պայթյունների կապակցությամբ, որոնք, վերջին տվյալներով, ավելի քան հարյուր մարդու կյանք են խլել, փոխանցում է «Ինտերֆաքս»-ը։

«Ընդունեք մեր խորին ցավակցությունները Քերման քաղաքում տեղի ունեցած ահաբեկչության ողբերգական հետևանքների առիթով։ Գերեզմանատուն այցելած խաղաղ բնակիչների սպանությունը ցնցող է իր դաժանությամբ և ցինիզմով»,- ասվում է Կրեմլի կայքում տեղադրված փաստաթղթում։

Պուտինը խնդրել է «կարեկցանքի և աջակցության խոսքեր փոխանցել զոհվածների հարազատներին և մերձավորներին, ինչպես նաև շուտափույթ ապաքինում մաղթել բոլոր վիրավորներին»։

«Մենք խստորեն դատապարտում ենք ահաբեկչությունն իր բոլոր ձևերով և դրսևորումներով և հաստատում ենք մեր հավատարմությունը այս չարիքի դեմ անզիջում պայքարին»,- ասվում է փաստաթղթում։

Հիշեցնենք, որ  Իրանում տեղի ունեցած ահաբեկչության զոհերի թիվը հասել է 103-ի, ևս 141-ը վիրավորվել են, հայտնում են տեղական լրատվամիջոցները։