Սյունիքի մարզի Տեղ համայնքի մոտ ադրբեջանական կողմի վերադասավորումների մասին հրապարակումներ կան։
Այս առիթով Hayastan.news-ը զրուցեց Սյունիքի Կոռնիձորի համայնքապետ Արշակ Կարապետյանի հետ։
-Պարոն Կարապետյան, մարզից տարբեր լուրեր են գալիս ադրբեջանցիների վերադասավորումների մասին, խոսվում է, որ առաջ են եկել հայկական պետության տարածք։ Ի՞նչ է կատարվում ձեր համայնքներում։
-Ինչպես գիտեք,Արցախը Հայաստանին կապող նոր ճանապարհի՝ Տեղ-Կոռնիձորի, շինարարությունը մոտենում է ավարտին։ Եվ, ընդամենը ճանապարհի փոփոխություն պետք է լինի, Կոռնիձորի մայրուղին որ կառուցում են, արդեն երթևեկելի է, ասֆալտապատած, 100 մետր է մնացել, դա էլ կավարտեն վաղը, ամսի մեկից արդեն կգործի նոր ճանապարհը։
-Այսինքն, ապրիլի 1-ից է փակվում Տեղից՝ Աղավնո ճանապարհը։
-Այո։
-Եթե այդպես է կամ Դուք տեղյակ էիք, որ ամսի 1-ից գործելու է նոր ճանապարհը, ուրեմն գիտեի՞ք, որ երեկ գիշեր Ադրբեջանը որոշակի փոփոխություններ է անելու։
-Էլի ասեմ․ մեր տարածք իրենք չեն մտել, դա հին խորհրդային սահմաներ որ ասում են, այ դա է։ ՀՀ տարածք չեն մտել։
-Այդ դեպքում, հին ճանապարհը ո՞ւմ տարածքում է մնացել, եթե իրենց, ապա ուրեմն մտել են ՀՀ տարածք, ձեր հարևան համայնքից ասում են, որ արտում անցակետ են դրել։
-Ոչ, ՀՀ տարածք մի թիզ չեն մտել։ Այս ամենը ճանապարհը փոխելու համար է։
-Իսկ համայնքում ի՞նչ իրավիճակ է։
-Դե անհանգստություն կա, բնական է, բայց արդեն սովորել ենք։ Ընդհանուր նորմալ է։