Hayastan.news-ը հայտնել էր, որ ԱԺ-ում ծեծկռտուք է գրանցվել, իրավապահները բաժին են տարել «Հայաստան» խմբակցության պատգամավոր Մհեր Սահակյանին։ ՔՊ-ի վարկածով՝ նա «հարձակվել է և մարմնական վնասվածքներ է պատճառել» Վլադիմիր Վարդանյանին։
ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը ներկայացրել է Ազգային ժողովում տեղի ունեցած միջադեպի վերաբերյալ իր տեղեկությունը։
Նա գրել է․ «Քիչ առաջ, ԱԺ պետաիրավական հանձնաժողովում փակ քննարկման ժամանակ, ընդդիմադիր «Հայաստան» խմբակցության պատգամավոր Մհեր Սահակյանը հարձակվել է հանձնաժողովի նախագահ Վլադիմիր Վարդանյանի վրա, հարվածել, մարմնական վնասվածքներ հասցրել վերջինիս և փախել: Այս խայտառակ խուլիգանությունը պետք է ունենա հստակ քրեաիրավական հետևանք»:
«Հայաստան» դաշինքի տեսակետը ներկայացնելու համար չի հաջողվում կապ հաստատել խմբակցության պատգամավորների հետ, նրանք հեռախոսազանգերին չեն պատասխանում։