Իրանի Իսլամական հեղափոխության պահապանների կորպուսը հայտարարել է, որ բալիստիկ հրթիռներով հարվածներ է հասցրել Իրաքում և Սիրիայում մի քանի թիրախների: Այդ թվում, ըստ իրանական ուժերի, հարձակման է ենթարկվել «իսրայելական լրտեսական կենտրոնը» Էրբիլ քաղաքի մոտ՝ Հյուսիսային Իրաքի քրդական ինքնավար շրջանի մայրաքաղաքը, ինչպես նաև Սիրիայում թիրախներ՝ կապված «Իսլամական պետության»:  

Ինչպես հայտնում է Reuters-ը՝ վկայակոչելով հետախուզական ծառայությունների աղբյուրներին, պայթյունները լսվել են Իրաքի Էրբիլ քաղաքից մոտ 40 կիլոմետր հեռավորության վրա՝ ներառյալ ԱՄՆ հյուպատոսարանն ու այս տարածքում գտնվող բնակելի թաղամասերը։

ԱՄՆ Պետդեպարտամենտը հայտարարել է, որ հարվածի հետևանքով ԱՄՆ-ի ոչ մի գույք չի վնասվել, սակայն դատապարտել է Իրանի գործողությունները:

«Մենք հետևել ենք այն հրթիռներին, որոնք խոցել են Հյուսիսային Իրաքը և Սիրիան։ Ոչ մի ամերիկյան օբյեկտ կամ անձնակազմ չի տուժել»,- ասել է Ազգային անվտանգության խորհրդի խոսնակ Ադրիեն Ուոթսոնը:

«Միացյալ Նահանգները խստորեն դատապարտում է Իրանի այսօրվա հարձակումները Էրբիլում և իր ցավակցությունն է հայտնում զոհվածների ընտանիքներին։ Մենք դեմ ենք Իրանի անխոհեմ հրթիռային հարձակումներին, որոնք խաթարում են կայունությունը Իրաքում»,-ասել է ԱՄՆ Պետդեպարտամենտի խոսնակ Մեթյու Միլլերը։

Իրաքի Քրդստանի իշխանությունները հայտնել են, որ Իրանի հարվածների հետևանքով զոհվել է առնվազն չորս խաղաղ բնակիչ, վեցը վիրավորվել է:

Տարածաշրջանի վարչապետ Մասրուր Բարզանին Էրբիլի վրա հրթիռային հարձակումն անվանել է «հանցագործություն քուրդ ժողովրդի դեմ»։

Իրաքը Թեհրանից հետ է կանչել իր դեսպանին խորհրդակցությունների և Իրանի գործերի ժամանակավոր հավատարմատարին կանչել էԲաղդադ՝ ի նշան իրանական հարվածների դեմ բողոքի:  

Իրաքի ԱԳՆ-ի հայտարարության մեջ ասվում է, որ հարվածները «Իրաքի Հանրապետության ինքնիշխանության բացահայտ խախտում են, խստորեն հակասում են բարիդրացիության սկզբունքներին և միջազգային իրավունքին և սպառնում են տարածաշրջանի անվտանգությանը»:

Իսլամական հեղափոխության պահապանների կորպուսը (ԻՀՊԿ) հայտարարել է տարածաշրջանում «լրտեսական կենտրոնների և հակաիրանական ահաբեկչական խմբավորումների հավաքների» ոչնչացման մասին։

Իսլամական հեղափոխության պահապանների կորպուսի հայտարարության համաձայն՝ հրթիռային հարվածն ուղղված է եղել Իրաքի քրդական շրջանում գտնվող իսրայելական հետախուզական «Մոսադ» ծառայության շտաբին: Այս պնդումների անկախ հաստատում չկա:

AFP-ն հայտնում է, որ հրթիռային հարված է հասցվել նաև Սիրիայում տեղակայված «Իսլամական պետության» ենթակառուցվածքին։

Իսլամական հեղափոխության պահապանների կորպուսը հավելել է, որ հարձակումը պատասխան էր «ահաբեկչական խմբավորումների վերջին հանցագործություններին, որոնք անարդարացիորեն նահատակեցին մի խումբ մեր սիրելի հայրենակիցների Քերմանում և Ռասկայում»:

«Իրանի Իսլամական Հանրապետությունն իր բարձր հետախուզական կարողություններով բացահայտեց հանցագործների շտաբը ճշգրիտ և նպատակաուղղված գործողությամբ և հարվածեց այն ճշգրիտ զենքերով», - ասել է ԱԳՆ խոսնակ Նասեր Քանանին՝ հավելելով, որ հարվածները «պարզապես պատիժ են» նրանց համար, ովքեր խարխլում են Իրանի անվտանգությունը։

Ըստ Reuters-ի վկայակոչված աղբյուրների՝ սպանվածների թվում են հայտնի քուրդ գործարար Փեշրա Դիզային և նրա ընտանիքի մի քանի անդամներ: Առնվազն մեկ հրթիռ ընկել է նրա տան վրա։

Մեկ այլ հրթիռ խոցել է քուրդ հետախուզության բարձրաստիճան աշխատակցի տունը, ևս մեկը խոցել է քրդական հետախուզության կենտրոնը, հայտնում է Reuters-ը: