ԱԺ նախագահ Ալեն Սիմոնյանն այսօր կտրականապես հրաժարվեց մեկնաբանել Նիկոլ Փաշինյանի որդու գրառումը, որով նա հերքում էր Ալեն Սիմոնյանի այն հայտարարությունը, թե վերջերս Փաշինյանի որդու նկատմամբ հարձակում է տեղի ունեցել:

«Չեմ մեկնաբանելու, ուզում ես` այլ որակում տուր»,-ասաց Սիմոնյանն ու անվտանգության աշխատակիցների ուղեկցությամբ հեռացավ։

Hayastan.news-ի թղթակից նորից հետաքրքրվեց, թե ինչու է Փաշինյանի որդին հերքում իր ասածներն ու ստահոդ որակում դրանք: «Ուզո՞ւմ ես` մի հատ էլ հարցրու, չեմ մեկնաբանելու»,-ասաց նա:

Նկատեցինք, որ Աշոտ Փաշինյանի այդ գրառումն իր էջով տարածում են նաև ՔՊ-ականներ, օրինակ` ՔՊ խմբակցության պատգամավոր Արուսյակ Մանավազյանը, ինչ-որ խնդի՞ր կա իշխանության հետ, Սիմոնյանն ասաց. «Կա խնդիր լրագրողների հետ»: 

Հիշեցնենք, որ ավելի վաղ Ալեն Սիմոնյանը Կասկադում տեղի ունեցած միջադեպից հետո, որի ընթացքում ինքը թքել էր սփյուռքահայ քաղաքացու վրա, գրառում էր արել՝ պնդելով, որ սադրանք է եղել նաև վարչապետի որդու՝ Աշոտ Փաշինյանի նկատմամբ։ Վերջինս, սակայն, այսօր հայտարարություն էր տարածել՝ նշելով, որ նման պնդումները «ստահոդ են»։

 

Վահե ՄԱԿԱՐՅԱՆ

Հետևեք Hayastan.news-ի տելեգրամյան ալիքին՝ https://t.me/Hayastannewsarm