Ֆուտբոլի Հայաստանի ազգային հավաքականի գլխավոր մարզիչ Ալեքսանդր Պետրակովը «Ֆասթ Մեդիա» հեռուստաընկերության հետ բացառիկ հարցազրույցում նշել է, թե ինչն է իր համար անակնկալ եղել Հայաստանում։

«Գիտեք, ձեր մտածելակերպը… Ես մի փոքր այլ պատկերացում ունեի Հայաստանի մասին: Ես, ինչպես ասում են, խորհրդային մարդ եմ, բայց երբ եկա այստեղ և տեսա ձեր մտածելակերպը, այն ինձ դուր եկավ: Մարդիկ շատ բարեհոգի են, օգնություն առաջարկող, չար չեն: Բոլորը հաջողություն են ցանկանում: Անկեղծորեն շնորհակալ եմ այդպիսի վերաբերմունքի համար: Շատ եմ ուզում փոխհատուցել այդ վերաբերմունքը: Չգիտեմ՝ կստացվի՞, թե՞ ոչ, բայց ես ուզում եմ օգնել Հայաստանին: Ես անկեղծորեն դա ուզում եմ անել, բայց ֆուտբոլիստներ են անհրաժեշտ՝ բաց և ուղիղ ասում եմ: Հիշե՛ք, մարզիչը միշտ կախվածություն ունի ֆուտբոլիստներից:

Մոտեցումները, բնավորությունները տարբեր են, հատկապես հայ ֆուտբոլիստների շրջանում: Նրանք հպարտ են, ահավոր տաքարյուն, եկեք խոստովանենք՝ կարգապահության տեսանկյունից այնքան էլ լավը չեն: Գալիս են հավաքական, ասում են՝ «ուզում եմ տուն գնալ», ասում եմ՝ «սպասի՛ր, ակումբում էլ ես ասո՞ւմ, որ գիշերելու ես ինչ-որ տեղ: Ակումբում գումար են ստանում, պայմանագիր կա, բայց սա ազգային հավաքականն է: Սա ամբողջ ազգի հպարտությունն է:

Հայաստանի ժողովուրդը քեզ պատվիրակում է ազգային հավաքական: Պետք է երկրիդ համար խաղալու պատասխանատվություն ունենաս:

Անկեղծ ասած՝ երբ եկա, զարմացա, որ հայ ֆուտբոլիստները 2-3 լեզու գիտեն, իսկ դա նույնպես մտածելակերպ է: Անկեղծ եմ ասում՝ նրանք բարձրակարգ կրթությամբ մարդիկ են: Երբեք դրա մասին չէի մտածել ու դա չէի սպասում: Իմ տարածաշրջանում արդեն այդպես չէ, բայց այստեղ ես նաև մեծերի նկատմամբ հարգանք տեսա: Նրանք հարգում են մեծերին ու լսում են նրանց: Դա հաճելի է: Ամենակարևորն այն է, որ մարզչին լսեն: Եթե մարզիչը տեսնում է, որ իրեն լսում են, որ մարզումների կամ տեսական պարապմունքների ժամանակ խաղացողներին փոխանցում է այն, ինչ ցանկանում է տեսնել, և նրանք իրեն լսում են ու սկսում են իրականացնել դա, լավ է: Իսկ երբ տեսնում ես, որ մարդիկ չեն կատարում, չեն լսում, իհարկե աղետ է: Բայց այս տղաներն այդպիսին չեն: Բոլորն են լսում, և մենք ընդհանուր հասկացողություն ենք գտել: Ինչ-որ տեղ ամեն ինչ չէ, որ ստացվում է, բայց տղաները լսում են: Դա հաճելի է»,- ասել է ուկրաինացի մասնագետը։

Մանրամասները սկզբնաղբյուր կայքում։