2024 թվականի ապրիլի 3-ին, ֆրանսիական կողմի հրատապ խնդրանքով, Ռուսաստանի Դաշնության պաշտպանության նախարար  Սերգեյ Շոյգուն հեռախոսազրույց է ունեցել Ֆրանսիայի Հանրապետության պաշտպանության նախարար Սեբաստիեն Լըկորնյուի հետ։ Այս մասին հայտնում է ՌԴ պաշտպանության նախարարությունը։

«Ֆրանսիայի պաշտպանության նախարարն իր ցավակցությունն է հայտնել 2024 թվականի մարտի 22-ին «Կրոկուս Սիթի Հոլ» համերգասրահում տեղի ունեցած ահաբեկչության կապակցությամբ։ Միաժամանակ նա  փորձում էր համոզել, որ Ուկրաինան և արևմտյան երկրները ներգրավված չեն ահաբեկչությունների մեջ՝ պատասխանատվությունը գցելով ԻԼԻՊ-ի վրա։

Սերգեյ Շոյգուն ընդգծել է, որ «Կրոկուս Սիթի Հոլում» տեղի ունեցած ահաբեկչության սկսված հետաքննությունը միանշանակ կավարտվի, և բոլոր մեղավորները կպատժվեն։ Ահաբեկչության կազմակերպման մեջ ուկրաինական հետքի մասին տեղեկություններ կան։

«Կիևի ռեժիմը ոչինչ չի անում առանց արևմտյան կուրատորների հավանության։ Մենք ակնկալում ենք, որ այս դեպքում ֆրանսիական հատուկ ծառայությունները չեն կանգնած դրա հետեւում»,- ասել է ՌԴ ռազմական գերատեսչության ղեկավարը։

Ելիսեյան պալատի՝ Ուկրաինա ֆրանսիական զորախումբ ուղարկելու մասին հայտարարությունների վերաբերյալ Սերգեյ Շոյգուն մատնանշել է, որ եթե դրանք գործնականում իրականացվեն, դա խնդիրներ կստեղծի հենց Ֆրանսիայի համար։

Միաժամանակ Շոյգուն և Լըկորնյուն նշել են Ուկրաինայում տիրող իրավիճակի շուրջ երկխոսության պատրաստակամությունը։ Ինչպես նշել է պաշտպանության նախարարությունը, նախնական դրույթները կարող են հիմնված լինել 2022 թվականին Ստամբուլում մշակված խաղաղության նախաձեռնության վրա։ Նրանք նաև ընդգծել են, որ Ժնևում գագաթնաժողովն առանց Ռուսաստանի մասնակցության անցկացնելն անիմաստ է»,-հայտնում է ՌԴ գերատեսչությունը։