ՄԱԿ-ի գլխավոր քարտուղար Անտոնիո Գուտերեշը ցանկանում է, որ Ուկրաինայում հակամարտությունը դադարեցվի՝ հարգելով տարածքային ամբողջականության սկզբունքը։ Այսպես է համաշխարհային կազմակերպության ղեկավարի պաշտոնական ներկայացուցիչ Ստեֆան Դյուժարիկը մեկնաբանել է տեղեկություններն այն մասին, որ ԱՄՆ նախկին նախագահ Դոնալդ Թրամփը, վերընտրվելու դեպքում, Կիևից տարածքային զիջումներ է փնտրելու՝ հակամարտությունը դադարեցնելու համար։

«ՄԱԿ-ի գլխավոր քարտուղարը ցանկանում է հակամարտության ավարտը տեսնել ՄԱԿ-ի համապատասխան բանաձևերի հիման վրա և հարգելով Ուկրաինայի տարածքային ամբողջականությունը», - պատասխանել է Դյուժարիկը լրագրողի հարցին։

Ապրիլի 7-ին The Washington Post-ը, վկայակոչելով աղբյուրներին, հայտնել էր, որ Թրամփը, եթե հաղթի գալիք նախագահական ընտրություններում, մտադիր է Ուկրաինայից տարածքային զիջումներ փնտրել՝ հակամարտությունը դադարեցնելու համար։ Հրատարակության աղբյուրների համաձայն՝ «Թրամփի առաջարկն է՝ ստիպել Ուկրաինային Ռուսաստանին զիջել Ղրիմը և Դոնբասի սահմանային շրջանը»։ Թրամփը ավելի վաղ հայտարարել էր, որ եթե հաղթի ԱՄՆ նախագահական ընտրություններում, կարող է 24 ժամվա ընթացքում վերջ տալ Ուկրաինայի հակամարտությանը։ Նա չի բացառել, որ Կիևը ստիպված կլինի գնալ տարածքային զիջումների։

Քաղաքական գործչի նախընտրական շտաբի խորհրդական Ջեյսոն Միլլերն ավելի ուշ ասել է, որ այս թեմայով ԶԼՄ-ների հաղորդագրությունները չեն համապատասխանում իրականությանը: