Իրանը չի ծրագրում անհապաղ պատասխան հարված հասցնել ուրբաթ օրը տեղի ունեցած իսրայելական հարձակումից հետո, նշում են՝ պարզ չէ, թե կոնկրետ ով է կանգնած դրա հետևում, հայտնում է Reuters-ը՝ վկայակոչելով իրանցի բարձրաստիճան պաշտոնյային:

«Անհապաղ պատասխան հարված հասցնելու ծրագիր չկա, հստակություն չկա, թե ով է կանգնած միջադեպի հետևում», - մեջբերում է գործակալությունը պաշտոնյայի խոսքերը:

Իրանցի բարձրաստիճան պաշտոնյան նաև ասել է գործակալությանը, որ Իրանը «արտաքին» հարձակման չի ենթարկվել, և իշխանությունների միջև քննարկումները հակված են ենթադրելու, որ դա «ներթափանցում» է երկրի տարածք:

«Արտաքին հարձակման աղբյուրը հաստատված չէ: Մենք արտաքին հարձակման չենք ենթարկվել, քննարկումներն ավելի շատ հակված են ներթափանցմանը, քան հարձակմանը»,- գործակալությանը ասել է պաշտոնյան։

Ամերիկյան լրատվամիջոցների փոխանցմամբ՝ ուրբաթ գիշեր Իսրայելը պատասխան հարված է հասցրել Իրանի թիրախներին։ Պայթյուններ են գրանցվել Սպահան քաղաքի մոտակայքում։ Իրանական IRIB պետական ​​գործակալությունը հայտնել է, որ երկրի մի շարք նահանգներում հակաօդային պաշտպանության համակարգերն արձագանքել են անօդաչու թռչող սարքերի մոտեցմանը։ Իրանցի երեք պաշտոնյաներ New York Times-ին հաստատել են, որ հարվածների թիրախը եղել է Սպահանի մերձակայքում գտնվող ավիաբազան։