Պայքարե՛նք, ժողովու՛րդ, պայքարե՛նք մնացյալ մեր երեխաների համար։ Այսպիսի կոչով է հանդես եկել «Որդիների կանչ» ՀԿ-ն՝ հրապարակելով 44-օրյա պատերազմում զոհված զինծառայող Մխիթար Գալեյանի մոր՝ Աստղ Գալեյանի հայտարարությունը։

«Պայքարե՛ք, որ մեր զգացածը դուք չզգաք, պայքարե՛ք, որ ձեր զավակներին դիահերձարաններում ման չգաք, պայքարե՛ք, որ ձեր զավակներն անհետ չգնան, որ գերի չմնան, պայքարե՛ք, որ ձեր տուն Եռագույնով պարուրված, փայտից, մեխերով զմռսված դագաղ  չբերեն, պայքարե՛ք, որ ձեր զավակներին իրականում գուրգուրեք, որ մեր պես կարոտից գժված քար չհամբուրեք։

Պայքարե՛ք, մարդի՛կ, որ ձեզ չխաբե՛ն, չխեղաթյուրե՛ն հազարամյա Հայոց պատմությունը մեր, պայքարե՛ք, որ հա՛յ կոչվեք»,-ասված է գրառման մեջ։