Որպես քրիստոնյա և Հայ առաքելական սուրբ եկեղեցու հետևորդ՝ ինձ այս հարցը (աղանդավորների թվի ավելացումը, դրա պատճառներն ու հետևանքները) միշտ հետաքրքրել ու մտահոգել է: Եվ ամեն անգամ այդ կողմով անցնելը առիթ է դառնում, որ այդ մասին մտածեմ: Լրագրող աշխատածս տարիներին անգամ 2 մեծ վերլուծություն էի արել քայքայիչ աղանդների տարածման պատճառների ու հետևանքների մասին:

 

Ենթադրում եմ, Հայ առաքելական սուրբ եկեղեցու բարձրաստիճան հոգևորականներին այս հարցը ավելի շատ է մտահոգում, քան ինձ:

Հիմա մտածում եմ՝ Կոտայքի մարզից Երևան գալիս և ենթադրաբար այդ շենքի մոտով անցնելիս, շարժման առաջնորդները կարո՞ղ է մի պահ կանգ առնեն և մարդկանցից հետաքրքրվեն՝ ինչո՞ւ են նրանք երես թեքել Հայ առաքելական սուրբ եկեղեցուց և դարձել աղանդավորական հոսանքի անդամ:

 

Հասկանում եմ, սահմանազատման ու սահմանագծման, քաղաքական կուրսի ու մնացած հարցերը չափազանց կարևոր են մեր որոշ բարձրաստիճան հոգևորականների համար, բայց համաձայնեք՝ սա էլ քիչ թե շատ իրենց հետ առնչություն ունի: Անկեղծ, չէր խանգարի քրիստոնեաբար, առանց ագրեսիայի զրուցել, խոսել, փորձել հասկանալ խնդիրը, մարդկանց մտածմունքները ու զգացածը: Կարող է պարզվել՝ այդտեղ էլ է Նիկոլ Փաշինյանն ու ՔՊ-ն մեղավոր:

 

Դե էլ չեմ ասում, որ այս ընթացքում իրենց միացած և աջակցող քրիստոնյաներին կարելի էր հուշել, որ մի տեսակ անհասկանալի է մի կողմից բարեպաշտ քրիստոնյա ներկայանալը, պարտաճանաչ եկեղեցի հաճախելը, իրենց էջերում օրումեջ աղոթքներ հրապարակելը, մյուս կողմից՝ մարդկանց վառելու ու կախաղան բարձրացնելու կոչեր անելը, ատելության խոսք տարածելը, բռնություն արդարացնելը ու յոթ հարկանի հայհոյանքներ գրելը՝ ավանդապաշտ հայ կնոջ կերպար ենթադրող նկարներով օգտահաշիվներով: Հուսով եմ, այս մասին խոսացած կլինեն (չնայած արդյունքը դեռ տեսանելի չէ):

 

Հ.Գ. - Գրեցի ու հիշեցի, որ մայիսի 9-ը հինգշաբթի է, դժվար թե կարողանան: Միգուցե ետ գնալիս փորձեն»: