Երեկ Ծանրամարտի Եվրոպայի առաջնության բացման ժամանակ դիզայներ Արամ Նիկոլյանի քայլը, երբ նա խլեց Ադրբեջանի դրոշն ու փորձեց այրել, բուռն քննարկումների առիթ է տվել:

Այսօր տեղեկություն տարածվեց, որ Արամ Նիկոլյանի Հանրային հեռուստաընկերությունն ազատել է աշխատանքից:

Հանրային Հեռուստաընկերության Հանրային և միջազգային կապերի տնօրեն Աննա Օհանյանը Hayastan.news-ի հետ զրույցում մեր հարցին` Նիկոլյանն իսկապե՞ս ազատվել է աշխատանքից, տվեց անորոշ պատասխան.

«Արամ Նիկոլյանը ծանրամարտի առաջնությանը որպես Հանրայինի աշխատակից չի ներգրավված եղել, այլ որպես հրավիրված մասնագետ»:

Օհանյանը, սակայն, հաստատեց, որ Արամ Նիկոլյանը հանդիսանում է Հանրայինի աշխատակից: Մենք նորից հարցրինք՝ եթե աշխատակից է, երեկվա արարքից հետո ազատվե՞լ է աշխատանքից, թե՞ ոչ, Աննա Օհանյանը կրկնեց նույնը.

«Ավելացնելու ոչինչ չունեմ»:

Նշենք, որ Երեւանում ծանրամարտի Եվրոպայի առաջնության կազմակերպումը վստահվել էր «Backhgroune production» ընկերությանը, իսկ Արամ Նիկոլյանն էլ, մեր տեղեկություններով, հեղինակել է հենց բացման արարողության զգեստները, այդ թվում` Ադրբեջանի ներկայացուցչի զգեստը: Ու թեև այս պահին նրա ազատման վերաբերյալ չկա պաշտոնապես որևէ բան, բայց մեզ ասացին` քննարկվում է այս հարցը, և հնարավոր է` շուտով լինի ազատման հրամանը: