Իրանի նախարարների խորհուրդը արտահերթ նիստ է անցկացրել փոխնախագահ Մոհամմադ Մոխբերի գլխավորությամբ։ Իրանի կառավարությունը հայտարարել է, որ կաշխատի «առանց խափանումների», հաղորդում է Presstv-ն:
Իրանի առաջին փոխնախագահ Մոհամմադ Մոխբերը, երկրի սահմանադրության համաձայն, 50 օրով կստանձնի ուղղաթիռի վթարի հետևանքով մահացած Էբրահիմ Ռաիսիի պարտականությունները՝ մինչև նոր նախագահական ընտրությունները, որոնք պետք է անցկացվեն հատուկ խորհրդի կողմից։ Այս մասին հաղորդում է իրանական ISNA գործակալությունը։
«Առաջին փոխնախագահը, համաձայն Իրանի Սահմանադրության 131-րդ հոդվածի, ստանձնում է նախագահի պարտականությունները, իսկ օրենսդիր և դատական իշխանության ղեկավարներից և անձամբ փոխնախագահից կազմված խորհուրդը պետք է կազմակերպի նոր նախագահի ընտրությունը 50 օրվա ընթացքում»,- ասված է հաղորդագրությունում։
Նշվում է, որ նախագահական ընտրությունները կարող են տեղի ունենալ հունիս-հուլիս ամիսներին։
Իսլամական Հանրապետության Սահմանադրության 131-րդ հոդվածի համաձայն՝ նախագահական նոր ընտրությունները պետք է կազմակերպվեն երկրի նախագահի մահվան կամ անաշխատունակության մասին հայտարարությունից և նրա պարտականությունները առաջին փոխնախագահին (ներկայումս վարում է Մոհամմադ Մոխբերը) փոխանցելու պահից 50 օրվա ընթացքում։
Ընտրությունները կազմակերպում է հատուկ ստեղծված խորհուրդը, որը բաղկացած է դատական իշխանության ղեկավարից, խորհրդարանի ղեկավարից (Իսլամական խորհրդի Մեջլիս) և անձամբ փոխնախագահից։
Ընտրությունների անցկացումը և նախագահի պաշտոնի համար թեկնածուների ընտրությունը վերահսկելու է Վերահսկիչ խորհուրդը (ըստ էության, խորհրդարանի վերին պալատը, որը վերանայում է շարիաթի և Իրանի սահմանադրությանը համապատասխանող օրինագծերը):
Սահմանադրության 132-րդ հոդվածի համաձայն՝ առաջին փոխնախագահին արգելվում է պաշտոնանկ անել նախարարներին կամ անվստահություն հայտնել նրանց, վերանայել սահմանադրությունը կամ հանրաքվե անցկացնել նախագահի պաշտոնում։
Իրանի նախագահ Էբրահիմ Ռայիսիի, արտաքին գործերի նախարար Հոսեյն Ամիր Աբդոլլահյանի և այլ պաշտոնյաների տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում։ Մայիսի 20-ի առավոտյան Իրանի փոխնախագահ Մոհսեն Մանսուրին հաստատել է տեղեկություններն այն մասին, որ նախագահը և նրա պատվիրակությունը զոհվել են ուղղաթիռի վթարի հետևանքով։ Պատվիրակությունը վերադառնում էր Ալիևի հետ հանդիպումից, Ռաիսին և Ալիևը մասնակցում էին Գիզ Գալասի հիդրոէլեկտրակայանի բացման արարողությանը և սահմանային Արաքս գետի վրա Խուդաֆերին հիդրոէլեկտրակայանի շահագործման հանձնմանը։