Իրանի նախկին նախագահ Մահմուդ Ահմադինեջադը գրանցվել է որպես թեկնածու Իբրահիմ Ռաիսիի մահից հետո հունիսի 28-ին նշանակված արտահերթ նախագահական ընտրություններում, հայտնում է Mehr-ը։

 

Ահմադինեջադը Իրանի վեցերորդ նախագահն է եղել 2005-2013 թվականներին։ Նրան այս պաշտոնում փոխարինել է Հասան Ռոհանին։ Ահմադինեջադը փորձել է մասնակցել ընտրություններին 2017 և 2021 թվականներին, սակայն նրան թույլ չեն տվել մասնակցել։ Այդ ընտրություններին մասնակցել է նաև Ռաիսին՝ 2017-ին պարտվել է Ռոհանիին, 2021-ին կարողացել է հաղթել և պետք է երկիրը ղեկավարեր չորս տարի՝ վերընտրվելու հնարավորությամբ։

 

Իրանի նախկին առաջնորդը հայտնի է իր կոշտ հռետորաբանությամբ։ Օրինակ՝ նա բազմիցս խոսել է 2001թ. սեպտեմբերի 11-ին ԱՄՆ-ում տեղի ունեցած ահաբեկչությունների մասին՝ դրանք անվանելով կեղծիք՝ արդարացնելու ԱՄՆ «ահաբեկչության դեմ պատերազմը» և Աֆղանստան ներխուժումը։

 

Բացի այդ, նա խոսել է աշխարհի քարտեզից Իսրայելը ջնջելու անհրաժեշտության մասին, հերքել է Հոլոքոստի գոյությունը՝ որպես երեւույթ, և «Սիոնիստական ​​ռեժիմը» ​​բնութագրել որպես «կոռուպցիայի բուծման հող»։

 

Ահմադինեջադը 2006 թվականին հայտարարել է, որ «Իրանը միացել է միջուկային տերությունների ակումբին»։ Միաժամանակ նա միջուկային զենքն անվանել է «անմարդկային» և ասել, որ Թեհրանին միջուկային ռումբ պետք չէ։

 

Ահմադինեջադից բացի, ընտրություններին որպես թեկնածու գրանցված է եւս մոտ 20 մարդ։ Նրանց թվում կա մեկ կին՝ Իրանի խորհրդարանի նախկին պատգամավոր Զոհրե Էլահիանը։ Այդ պաշտոնի հավակնորդների թվում են նաև մշակույթի նախարար Մոհամմադ Մեհդի Էսմայիլին, նախկին փոխնախագահ Մասուդ Զարիբաֆանը, խորհրդարանի նախկին պատգամավոր Մահմուդ Սադեղին, Իսլամական հեղափոխության պահապանների կորպուսի նախկին հրամանատար Վահիդ Ահանյանը, Կենտրոնական բանկի նախկին ղեկավար Աբդոլնասեր Հեմմատին և այլք: