Հայաստանն ու Ադրբեջանն իրար առջև բարձրաձայնել են դիրքորոշում, համաձայն որի՝ յուրաքանչյուրը մյուսի Սահմանադրության մեջ էական խնդիրներ ու խոչընդոտներ է տեսնում երկարատև խաղաղության հաստատման համար։Այս մասին ԱԺ-ում հայտարարել է ՀՀ արտաքին գործերի նախարար Արարատ Միրզոյանը։

Միրզսոյանը նշել է, որ սա ամենևին չի նշանակում, որ օրինակ՝ Հայաստանում սահմանադրական փոփոխությունների հարցը Հայաստանի և Ադրբեջանի միջև բանակցությունների առարկա է կամ օրակարգի մաս է։

«Այդպիսի բան չկա։ Մենք համոզմունք ունենք, որ և՛ մեր, և՛ Ադրբեջանի Սահմանադրությունը, մեծ հաշվով, չի կարող իրավական առումով խնդիր լինել երկարատև խաղաղության հաստատման համար։ Ինչ վերաբերում է մեր սահմանադրական փոփոխություններին, ապա արժի թարմացնեք ձեր հիշողությունը՝ մենք այս մասին խոսում ենք դեռևս 2018 թվականից, սա մեր գործն է, սա ներքին որոշելիք է՝ Կառավարության, այնուհետև հանրաքվեի տեսքով»,- ասաց նա և ևս մեկ անգամ ընդգծեց, որ Հայաստան-Ադրբեջան բանակցություններում թե մեր, թե Ադրբեջանի Սահմանադրության փոփոխությունները օրակարգի մաս չեն կազմում։