Կառավարության պատասխանատվությունը պատմական այս ժամանակաշրջանում ունի միայն մեկ արտահայտություն, դա խաղաղությունն է, ինչը նշանակում է կարգավորված հարաբերություններ բոլոր 4 հարևանների հետ։ Այս մասին ԱԺ-ում հայտարարեց ՀՀ վարչապետ Նիկոլ Փաշինյանը:
«Ու քանի որ Վրաստանի ու Իրանի հետ հարաբերությունների ոչ թե կարգավորման, այլ առավել խորացման խնդիր ունենք, ուրեմն` խաղաղություն նշանակում է կարգավորված հարաբերություններ Ադրբեջանի և Թուրքիայի հետ»,- ասաց նա։
Ըստ վարչապետի՝ հարցը հետևյալն է՝ իսկ որքանո՞վ է դա իրատեսական, իրագործելի:
«Այս հարցն ունի երկու երես. Առաջինը, քանի որ խաղաղությունը միայնակ չեն կառուցում, որքանով Ադրբեջանի գործողությունները գործողությունները կլինեն խաղաղությանը միտված։ Եվ երկրորդը, հատկապես 44-օրյա պատերազմից հետո եթե քաղաքական-դիվանագիտական մակարդակում ձեռք բերվեն կոմպրոմիսներ, դրանք որքանո՞վ ընդունելի կլինեն ՀՀ քաղաքացիների համար և քաղաքացիները որքանո՞վ թույլ կտան այդ կոմպրոմիսների, երբեմն ցավոտ լուծումների գործնական իրագործումը։ Սա նույնպես մեր պատասխանատվությունն է, մենք պիտի մեր մտքերի և գործողությունների ընթացքը հասկանալի դարձնենք ՀՀ քաղաքացիներին, և երբ նրանք դա հասկանան, նրանք նաև կընդունեն»,–ասաց Փաշինյանը և հավելեց՝ խաղաղությունը հնարավոր է, եթե միջազգային հարաբերություններում հստակ արձանագրենք, որ ՀՀ ենք ճանաչում 29 800 քառակուսի/կմ տարածքը և մենք որևէ այլ երկրից որևէ տարածքային պահանջ չունենք և չենք ունենալու:
«Եթե մենք այս միտքը չարձանագրենք, ոչ ոք մեզ թույլ չի տալու զարգանալ»,- ասաց նա: