Աջափնյակի կայարանը նախագծվում է «Մետրոգիպրոտրանս» ընկերության կողմից, որը երևանյան մետրոյի նախագծման ինստիտուտն է եղել խորհրդային ժամանակաշրջանում։ Այս մասին հայտարարեց Երևանի փոխքաղաքապետ Տիգրան Ավինյանը:

«Նախագծային աշխատանքների առաջին փուլն ընկերության կողմից արդեն իսկ հանձնված է, և մենք այս պահի դրությամբ զուգահեռ երկրորդ և երրորդ փուլերը իրականացնում ենք։ Տարվա ավարտին ունենալու ենք Աջափնյակի մետրոյի կայարանի ամբողջական նախագիծը, զուգահեռ ունենալու ենք նախագծման մրցույթի դրված Սուրմալուի հարակից հատվածում գտնվող կայարանի նախագծման աշխատանքները»,- ասաց Ավինյանը։

Տիգրան Ավինյանը վստահեցրեց, որ խիստ մոտեցում է ցուցաբերվելու Աջափնյակի կայարանի նախագծային մասին, որ մետրոպոլիտենի ճարտարապետության ընդհանուր տրամաբանությունը պահպանվի․ «Մետրոյի հետագա հնարավոր զարգացումը լինելու է դեպի Նազարբեկյան թաղամաս, մետրոյի ցանցը տարեցտարի ընդլայնվելու է»։