Հայաստանի արտաքին գործերի նախարար Արարատ Միրզոյանը կարծում է, որ Երևանում անցկացվող Հայաստան-ԱՄՆ ռազմավարական երկխոսության ամփոփիչ նիստը ևս մեկ օրինակ է Հայաստանի ու ԱՄՆ-ի միջև բարձր մակարդակի քաղաքական երկխոսության, որը նոր խթան կհաղորդի Հայաստանի և ԱՄՆ-ի միջև զարգացող գործընկերությանը։

«Արմենպրես»-ի փոխանցմամբ՝  Արարատ Միրզոյանն այս մասին ասաց ՀՀ ԱԳՆ-ում մեկնարկած Հայաստան-ԱՄՆ ռազմավարական երկխոսության ամփոփիչ նիստին ունեցած ելույթում։  

«Ժողովրդավարական սկզբունքների նկատմամբ ամուր հանձնառությունը մեր գործընկերության առանցքում է՝ չնայած այն հանգամանքին, որ ժողովրդավարությունը վտանգված է ամբողջ աշխարհում, այդ թվում՝ մեր տարածաշրջանում։ Չնայած անվտանգության մարտահրավերներին և առաջացող հիբրիդային սպառնալիքներին՝ Հայաստանի կառավարությունը վճռական է հետևել իր ժողովրդի կատարած ժողովրդավարական ընտրությանը՝ ամրապնդելու համապատասխան պետական ինստիտուտները, ապահովելու  օրենքի գերակայությունը և մարդու իրավունքների ամուր պաշտպանությունը։ Այս համատեքստում մեր մասնակցությունը հանուն ժողովրդավարության գագաթնաժողովին, փաստում է մեր հանձնառությունը և ներգրավվածությունը՝ միտված առավել ամուր ժողովրդավարության կառուցմանը»,- ասաց Միրզոյանը։

ՀՀ ԱԳ նախարարը հավատացած է, որ Հայաստանի համախոհ գործընկերները, մասնավորապես ԱՄՆ-ն, լիովին աջակցում են և կանգնած են մեր կողքին՝ ապացուցելու, որ ժողովրդավարությունը կարող է արդյունքներ ապահովել։

«Հաջողության հասնելու համար մենք պետք է խորացնենք բազմաոլորտ և տարբեր ուղղություններ ընդգրկող համագործակցությունը՝  ներառյալ տնտեսության և էներգետիկայի, պաշտպանության և անվտանգության, բարձր տեխնոլոգիաների և կիբեռանվտանգության, արդարադատության և օրենքի գերակայության ոլորտները։ Մեր երկկողմ օրակարգը շարունակում է ընդլայնվել և ներառել Հայաստանի դիմակայունության և կայուն զարգացման համար կարևոր ուղղությունները։  Այս համատեքստում ցանկանում եմ հիշատակել ապրիլի 5-ին Բրյուսելում կայացած Հայաստան-ԱՄՆ-ԵՄ  բարձր մակարդակի հանդիպումը և համատեղ մամուլի հայտարարության մեջ արտացոլված պայմանավորվածությունները»,- ասաց Արարատ Միրզոյանը։