Ռուբեն Վարդանյանը հրաժարվել է ՌԴ քաղաքացիությունից և դա արել է բացահայտ։ Այս մասին ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով հարցին, թե արդյոք ռուսական կողմը քննարկում է Ռուբեն Վարդանյանին ազատ արձակելու թեման։

«Գիտեք, ես չեմ տեսել, թե հայ-ադրբեջանական շփումների ժամանակ բարձրացվե՞լ է արդյոք Հայաստանի քաղաքացի Ռուբեն Վարդանյանի՝ ադրբեջանական բանտում գտնվելու հարցը։ Հիմա, եթե դուք ինձ տրամադրեք այս տեղեկատվությունը, ինձ համար շատ հետաքրքիր և օգտակար կլինի իմանալ դրա մասին: Եվս մեկ անգամ հիշեցնեմ, որ Ռուբեն Վարդանյանը հրաժարվել է ՌԴ քաղաքացիությունից և դա արել է բացահայտ։ Ուստի նման հարցերը պետք է ուղղվեն Բաքվին ու Երեւանին»,- ասել է Զախարովան։

Նա ընդգծել է, որ ընդհանուր առմամբ Ռուսաստանի Դաշնությունը միշտ աջակցել է եռակողմ համաձայնագրերի իրականացմանը, որոնց առանցքային տարրը բոլոր կալանավորված անձանց ազատ արձակումն է։