Երեք ավիաընկերության օդանավերը չեն կարողացել ժամանակին վայրէջք կատարել «Զվարթնոց» օդանավակայանում եղանակային անբարենպաստ պայմանների՝ ուժգին քամու պատճառով։ Տեղեկությունը Sputnik Արմենիային հայտնել է Հայաստանի քաղաքացիական ավիացիայի կոմիտեի ղեկավարի օգնական Լիլիթ Աղաբեկյանը ։

Ավելի վաղ ԶԼՄ-ները, հղում անելով «Flightradar»-ի տվյալներին, հայտնել էին, որ Վիեննայից, Անթալիայից, Հռոմից, Սոչիից և Ռիգայից մեկնած ինքնաթիռները մի քանի ժամ չեն կարողացել վայրէջք կատարել Երևանում։

Աղաբեկյանը պարզաբանել է, որ «Armenian Airlines»-ի Սոչի-Երևան չվերթ իրականացնող ինքնաթիռը ուղևորվել է Թբիլիսի, հիմա վերադառնում է Հայաստանի մայրաքաղաք։ Եվս երկու ինքնաթիռ, որոնք Երևան են հասել Դուբայից («Fly Dubai») և Ռիգայից («airBaltic»), ստիպված են եղել մի քանի պտույտ անել «Զվարթնոց» օդանավակայանում վայրէջք կատարելուց առաջ։

Այս պահին օդանավակայանն աշխատում է բնականոն հունով, չվերթներն իրականացվում են ժամանակին: