Հունգարիայի վարչապետ Վիկտոր Օրբանը մեկնում է Վաշինգտոն՝ մասնակցելու ՆԱՏՕ-ի գագաթնաժողովին, սակայն այդ ուղևորությունը կօգտագործի նաև իր «խաղաղ առաքելության» համար, որի ընթացքում կարող է հանդիպել նրանց հետ, ովքեր «կարող են օգնել խաղաղության գործին»: «Ռիա Նովոստի»-ի հաղորդմամբ՝ այս մասին ասել է Հունգարիայի վարչապետի վարչակազմի ղեկավար Գերգելի Գուլյասը։

«Վարչապետը Վաշինգտոն է մեկնում մի քանի ամիս առաջ ՆԱՏՕ-ի գագաթնաժողովի համար հայտնի ամսաթվերին, բայց, իհարկե, այդ ուղևորությունը կարող է ծառայել լավ նպատակի՝ խաղաղության գործին», - ասել է նա կառավարության ճեպազրույցում:

Նա խուսափել է պատասխանել այն հարցին, թե արդյոք Օրբանը կհանդիպի ԱՄՆ նախագահ Ջո Բայդենի կամ նախկին նախագահ Դոնալդ Թրամփի հետ՝ ասելով, որ ամեն ինչ հայտնի կդառնա «ճիշտ ժամանակին»՝ ընդգծելով, որ «որպես խաղաղության առաքելության մաս՝ արժե հանդիպել նրանց, ովքեր կարող են օգնել խաղաղության գործում»։