Ռուսաստանի Դաշնության փոխարտգործնախարար Միխայիլ Գալուզինը, մեկնաբանելով Հայաստանում ԵՄ առաքելության աշխատանքը, ՌԻԱ Նովոստիին ասել է, որ հիմքեր կան ենթադրելու, որ այսպես «Արևմուտքը հետախուզական տվյալներ է հավաքում ռուսական օբյեկտների, ինչպես նաև Հայաստանին հարևան բոլոր պետությունների վերաբերյալ»։

«Մենք բացասաբար ենք գնահատում ԵՄ առաքելության գործունեությունը Հայաստանում, ինչի մասին բազմիցս ասվել է»,- ասել է նա։

Գալուզինի խոսքով, «Եվրամիության խնդիրն ակնհայտ է․ դա տարածաշրջանում ոտք դնելու փորձ է՝ ի վնաս հարավկովկասյան պետությունների ավանդական գործընկերների և հարևանների՝ Ռուսաստանի, Իրանի, Թուրքիայի շահերին»։

«Մենք ԵՄ դիտորդների աշխատանքից որևէ շոշափելի արդյունք չենք տեսնում»,- ընդգծել է նա և հավելել, որ «նրանց ներկայությունը չի կանխել հայ-ադրբեջանական սահմանին պարբերական սրացումները»։

«Նրանք իրենց զեկույցներն ուղղակիորեն ուղարկում են Բրյուսել և չեն կիսում դրանք նույնիսկ հայկական կողմի հետ, կան բոլոր հիմքերը ենթադրելու, որ արևմտյան երկրները հետախուզություն են հավաքում ռուսական օբյեկտների, ինչպես նաև Հայաստանին հարևան բոլոր պետությունների վերաբերյալ», - ասել է Գալուզինը։