Հուլիսի 22-ին ՀՀ ՏԿԵ նախարար Գնել Սանոսյանի և Վարդենիս համայնքի ղեկավար Ահարոն Խաչատրյանի հետ  համատեղ աշխատանքային այց կատարեցի Գեղարքունիքի մարզի Վարդենիս համայնքի Մեծ Մասրիկ գյուղի տարածքում կառուցման ընթացքի մեջ գտնվող «Մասրիկ-1» արեւային ֆոտովոլտային կայանի շինհրապարակ։ Այս մասին ֆեյսբուքյան իր էջում գրել է Գեղարքունիքի մարզպես Կարեն Սարգսյանը։

«Ինչպես տեղում ներկայացրին շինարարական աշխատանքներն իրականացնող ,,Շտիգեն,, ընկերության ներկայացուցիչները, Գեղարքունիքի մարզում կառուցվում է Հայաստանի ամենախոշոր արևային կայանը, որը զբաղեցնում է 130 հեկտար տարածք և կունենա 62 մեգավատ հզորություն։ 
Շինարարությունը սկսվել է 2023 թվականի նոյեմբերից, որտեղ  ներգրավվել է ավելի քան 130 աշխատակից, այդ թվում՝ Մեծ Մասրիկ բնակավայրից։ 

«Մասրիկ-1» արևային կայանը տարեկան արտադրելու է 128.332 գեգավատ ժամ էլեկտրաէներգիա, ինչը կբավարարի ավելի քան 20 000 տնտեսության էներգետիկ կարիքները։ Ի դեպ, այս ցուցանիշը թույլ կտա խուսափել տարեկան ավելի քան 54 000 տոննա ածխաթթու գազի արտանետումից։ Բացի այդ, կայանի կառուցման համար կօգտագործվի 114 984 արևային վահանակ։ Կայանի կառուցումը կատարվում է միջազգային չափորոշիչներին համապատասխան։  Զրուցեցինք կայանի սեփականատեր ու կապալառու ընկերությունների եւ շինարարության պատասխանատու ներկայացուցիչների հետ, ծանոթացանք աշխատանքների ընթացքին։ Շինարարական աշխատանքները նախատեսվում է ավարտի հասցնել այս տարվա հոկտեմբերին»,-գրել է նա։