«Հայրենիք» կուսակցության առաջնորդ, ԱԱԾ նախկին տնօրեն Արթուր Վանեցյանն այսօր ուղերձ էր հղել Հայոց ցեղասպանության 108-րդ տարելիցի առթիվ՝ նշելով, որ «այլևս երբեք թույլ չենք տալու, որ նման ողբերգությունները կրկնվեն»։ Hayastan.news-ն այսօր Ծիծեռնակաբերդի հուշահամալիրում Արթուր Վանեցյանից հետաքրքրվեց՝ ինչպե՞ս պետք է անենք, որ նոր ցեղասպանություն թույլ չտանք։

 

 

Նա նախ նկատեց, որ մեր հայրենիքի արցախյան հատվածում այսօր շուրջ 120 հազար մարդ կանգնած է իրական ցեղասպանության եզրին, և որ դրանք ուղղակի խոսքեր չեն, ապա նշեց՝ ինչ պետք է անենք, որ այլևս երբեք չլինեն ցեղասպանություններ։

 

 

«Նախ առաջին հերթին պետք է հասնենք նրան, որ միջազգային հանրությունը դատապարտի և ճանաչի Ցեղասպանությունը։ Երկրորդ, ամենակարևորը՝ պետք է հզորացնենք մեր հայրենիքը, պետք է ուժեղանանք, պետք է ունենանք անվտանգ երկիր, տնտեսապես զարգացած երկիր, որպեսզի որևէ մեկի մտքով անգամ չանցնի, որ հնարավոր է՝ հայ ազգին ցեղասպանել»,-ասաց Արթուր Վանեցյանը։

 

 

Մեր դիտարկմանը, թե հանրությունը այդ կոչերին, ուղերձներին զուգահեռ նաև հստակ քայլեր է ակնկալում, Վանեցյանն ասաց․ «Դա գործիքներից մեկն է, որը պետք է լինի։ Իսկ ի՞նչ եք կարծում, պե՞տք է ուղերձներ լինեն, հարցազրույցներ լինեն, թե՞ ընդհանրապես պետք է չլինի ոչ մի բան։ Կոնկրետ քայլեր՝ ես 2019 թվականի սեպտեմբերից, երբ հրաժարական եմ տվել իմ զբաղեցրած պաշտոնից, այդ օրվանից ես մտել եմ ակտիվ պայքարի մեջ և շարունակելու եմ պայքարել»։

 

Մանրամասն՝ տեսանյութում

 

Վահե ՄԱԿԱՐՅԱՆ