ԱՄՆ նախագահական ընտրություններում անկախ թեկնածու Ռոբերտ Ֆիցջերալդ Քենեդին ցանկանում է նախագահի թեկնածու Դոնալդ Թրամփի հետ համաձայնության հասնել և սատարել նրան՝ Թրամփի հնարավոր վարչակազմում պաշտոնի դիմաց։ «Արմենպրես»-ի փոխանցմամբ՝ այս մասին Reuters գործակալությանը հայտնել են Քաղաքական գործողության հանձնաժողովներից մեկից։

ԱՄՆ 35-րդ նախագահ Ջոն Քենեդիի եղբորորդին հայտարարել է, որ օգոստոսի 23-ին ելույթ կունենա Արիզոնայում և կխոսի «ներկայիս պատմական պահի և առաջ շարժվելու իր ուղու մասին»։

Հասարակայնության հետ կապերի ամրապնդման գծով տնօրեն Լարի Շարփը Reuters-ին հայտնել է, որ Քենեդին ծրագրում է դուրս գալ ընտրապայքարից և սատարել Թրամփին, բայց դա կախված է նրանից, թե նախկին նախագահն ընտրվելու դեպքում ինչ պաշտոն կառաջարկի Քենեդիին։ 

Օրերս Թրամփը CNN-ին հայտնել էր, որ պատրաստ է դիտարկել Քենեդիին իր վարչակազմում դեր տալու հնարավորությունը, եթե վերջինս դուրս գա ընտրապայքարից և սատարի իրեն։

Օգոստոսի 21-ին ABC News-ը, հղում անելով իր աղբյուրներին, հայտնել էր, որ Քենեդին ծրագրում է մինչև շաբաթվա վերջը դուրս գալ նախագահական ընտրապայքարից և իր աջակցությունը հայտնել Թրամփին։

Քաղաքական գործողության հանձնաժողովները կարող են անսահման քանակությամբ գումար հանգանակել թեկնածուների համար։ Ըստ հրապարակման՝ American Values հանձնաժողովը մինչև հունիսի 30-ը Ռոբերտ Քենեդիի համար հավաքել էր ավելի քան 50 միլիոն դոլար։ 

ԱՄՆ-ում նախագահական ընտրությունները կկայանան նոյեմբերի 5-ին։ Դեմոկրատական կուսակցությունը նախագահի թեկնածու է առաջադրել ԱՄՆ փոխնախագահ Քամալա Հարիսին։