Այսօր մեկնարկել է Ադրբեջանի Միլլի Մեջլիսի արտահերթ ընտրությունների քվեարկությունը։ Քվեարկությունը սկսվել է ժամը 08:00-ին։
Մինչ քվեարկությունը երկրի Կենտրոնական ընտրական հանձնաժողովի (ԿԸՀ) նախագահ Մազահիր Փանահովը մամուլի ասուլիս է հրավիրել և տեղեկացրել ընտրությունների նախապատրաստման ընթացքի և ընտրությունների կապակցությամբ ԿԸՀ կատարած աշխատանքների մասին։
ԿԸՀ նախագահը տեղեկացրել է, որ խորհրդարանական ընտրություններն ընդգրկում են 125 ընտրատարածք և ընդհանուր առմամբ 6478 ընտրատեղամաս (6343 մշտական և 135 ժամանակավոր տեղամասեր)։
Խորհրդարանական ընտրություններում ընտրելու իր իրավունքից կարող է օգտվել 6 421 960 ընտրող։ Այս ընտրողների 47,55 տոկոսը տղամարդիկ են, 52,45 տոկոսը՝ կանայք։ Միլլի Մեջլիսի ընտրություններին առաջին անգամ մասնակցած ընտրողների թիվը 51141 է։
Քվեարկության համար տպագրվել է 6 516 567 քվեաթերթիկ։
Խորհրդարանական ընտրություններին հետեւելու համար գրանցվել է 112749 տեղական և 598 միջազգային դիտորդ (51 հաստատություններից 69 երկրների քաղաքացիներ)։
Միլլի Մեջլիսում 125 պատգամավորական մանդատի համար պայքարում է 990 թեկնածու։ Ընտրություններին որպես թեկնածու գրանցվել են 25 քաղաքական կուսակցությունների 305 ներկայացուցիչներ։ Թեև թեկնածուներից 371-ը քաղաքական կուսակցության անդամներ են, սակայն կուսակցությունների կողմից չեն առաջադրվել։
Քվեարկությունը կավարտվի ժամը 19:00-ին։