ՀՀ ԱԳՆ-ից հայտնում են, որ նախարարի տեղակալ Վահան Կոստանյանը սեպտեմբերի 1-ին Պրահայում մասնակցել է  «GLOBSEC» համաժողովի  շրջանակներում անցկացվող «Armenia and the EU: Priorities, Partnerships, and Paths Forward» պանելային քննարկմանը։  

Նախարարի տեղակալը անդրադարձել է Հայաստանի արտաքին քաղաքականությանը եւ նշել դիվերսիֆիկացիայի կարևորությունը` միտված Հայաստանի Հարապետության ինքնիշխանության, միջազգային սահմանների, ժողովրդավարության պաշտպանությանը: 

Վահան Կոստանյանը ԵՄ հետ համագործակցության համատեքստում կարևորել է Հայաստանի և ԵՄ անդամ երկրների միջև ձևավորված ակտիվ քաղաքական երկխոսությունը, ընդգծելով ինչպես երկկողմ ձևաչափով, այնպես էլ ԵՄ հարթակում գործընկերության խորացման նշանակալի հեռանկարների առկայությունը՝ հիմնված համագործակցության ամուր հիմքերի վրա։

ԱԳ նախարարի տեղակալը կարևորել ՀՀ-ԵՄ համագործակցության խորացումը և գործընկերության նոր օրակարգի ձևավորումը՝ միտված ՀՀ դիմակայունության ամրապնդմանը եւ ժողովրդավարական բարեփոխումների իրականացմանը։

Անդրադարձ է կատարվել նաև տարածաշրջանային զարգացումներին: 
Անդրադառնալով Հայաստան-Ադրբեջան հարաբերությունների կարգավորման գործընթացին` Վահան Կոստանյանը  վերահաստատել է Հարավային Կովկասում և տարածաշրջանում խաղաղություն հաստատելու Հայաստանի պատրաստակամությունը եւ նշել, որ Հայաստանը ադրբեջանական կողմին է փոխանցել Հայաստանի և Ադրբեջանի միջև խաղաղության պայմանագրի 10-րդ փաթեթը:

 

ՀՀ ԱԳ նախարարի տեղակալը ներկայացրել է ՀՀ կառավարության կողմից մշակված «Խաղաղության խաչմերուկ» ծրագիրը` վերահաստատելով  Հայաստանի պատրաստակամությունը բացելու տարածաշրջանային կապուղիները` ինքնիշխանության, իրավազորության, փոխադարձության ու հավասարության սկզբունքների հիման վրա: