Կապանի քաղաքապետ Գևորգ Փարսյանը Hayastan.news-ի հետ զրույցում դժվարացավ ասել՝ արդյոք անվտանգային երաշխիքներ ստացե՞լ են, որ որոշել են Կապանի օդանավակայանում տեխնիկական թռիչք իրականացնել։

Միայն ասաց՝ թռիչքը նորմալ ընթացավ, առանց որևիցե խնդրի։

-Իսկ ինչպե՞ս որոշվեց, որ հենց հիմա պետք է օդանավակայանի շահագործման փորձեր արվեն, և արդյոք այս թռիչքից հետո Քաղավիացիայի կոմիտեն թույլ կտա՞, որ կանոնավոր թռիչքներ լինեն։

-Իմ իմանալով՝ տեխնիկական թռիչք էր այս թռիչքը, և կանոնավոր թռիչքների հետ կապված՝ հույսով եմ, որ կանոնավոր թռիչքները շուտով կլինեն։

-Տեխնիկական՝ նշանակում է փորձնակա՞ն։

-Այո, փորձնական տեխնիկական թռիչք էր սա։

-Իսկ անվտանգության մասով ի՞նչ երաշխիքներ կան, որովհետև ադրբեջանցիները հենց օդանավակայանի կողքի սարի լանջին են նստած։

-Անվտանգության երաշխիքների հետ կապված՝ բան չեմ կարող ասել, պարզապես կարող եմ ասել, որ այսօր տեղի ունեցավ թռիչքը, և որևիցե խնդիր չեղավ թռիչքի ընթացքում։

-Բայց մարդկանց մոտ մտավախություն կա, որ կարող է կրակեն, չէ՞, թռիչքի պահին։ Հիմա ի՞նչ երաշխիք կա, որ չեն կրակի։ Քաղաքական համաձայնություն կա՞ ադրբեջանական կողմի հետ, որ չեն կրակելու։

-Ես այդ հարցին կդժվարանամ պատասխանել՝ կա՞ համաձայնություն, թե՞ ոչ, բայց կարևորում եմ, որ կանոնավոր թռիչքներ լինեն։

-Իսկ Դուք այդ թռիչքի որոշման կայացմանը մասնակցե՞լ եք։

-Չէ, որոշման կայացմանը չեմ մասնակցել, բայց այսօր ներկա էի տեխնիկական թռիչքին։

-Իսկ կանոնավոր թռիքչների թույլտվություն կա՞ արդեն։

-Իմ իմանալով՝ դեռ այդ թույլտվությունը չկա։

-Կարծիք կա, որ հնարավոր է՝ հերթական մի զիջման դիմաց է Ադրբեջանը համաձայնել այս թռիչքին։

-Չգիտեմ, չեմ կարող ասել, տեղյակ չեմ։ Գիտեմ, որ այսօր տեխնիկական թռիչք իրականացվեց, ու հուսով եմ, որ շուտով կլինեն նաև կանոնավոր թռիչքներ, որովհետև դա կարևոր է։ Վահե ՄԱԿԱՐՅԱՆ