Ես այցելել եմ ադրբեջանցի կալանավորված զինծառայողներին՝ որպես ՀՀ Մարդու իրավունքների պաշտպան։ Հիմնական հարցադրումները, որոնք քննարկման առարկա են դարձել, իրենց իրավունքների ապահովման վիճակն էր և իրենց պահման պայմանները, որոնք դարձյալ իրավունքների պաշտպանության տեսանկյունից են կարևորություն ներկայացնում։ Այս մասին այսօր լրագրողների հետ զրույցում ասաց ՀՀ ՄԻՊ Անահիտ Մանասյանը՝ անդրադառնալով ՀՀ տարածք ներխուժած և այստեղ մեր իրավապահների կողմից կալանավորված ադրբեջանցի զինծառայողներին իր այցելությանը։

Hayastan.news-ի հարցին՝ իրենք դժգոհե՞լ են որևէ բանից, Մանասյանն ասաց․ «Նշեմ, որ պետական մարմինների և պաշտոնատար անձանց կողմից վատ վերաբերմունքի դեպքերի վերաբերյալ բողոք նրանց կողմից չի ստացվել։ Պահման պայմաններին ես անձամբ եմ ծանոթացել, այսինքն՝ խցային պայմաններին և այլն, նաև այն հանգամանքին, թե արդյոք նրանք ստանո՞ւմ են խմելու ջուր, սնունդ, այդ առումով ևս որևէ բողոք նրանց կողմից չի ներկայացվել»։