Վիետնամում «Յագի» թայֆունի հետևանքով առաջացած սողանքների ու հանկարծակի ջրհեղեղների զոհերի թիվը հասել է 226-ի, հայտնում է այդ երկրի արտակարգ իրավիճակների գործակալությունը: Միաժամանակ մայրաքաղաք Հանոյում ջրհեղեղի վտանգը նվազել է:

«Յագի» թայֆունը, որը տարվա ամենահզոր փոթորիկն է Ասիայում, հարվածել է Վիետնամի հյուսիսարևելյան ափերին շաբաթ օրը: Ավելի քան 100 մարդ դեռ անհետ կորած է, իսկ մոտ 800-ը վիրավոր են:

Հանոյի մի քանի շրջաններ դեռ ջրով ծածկված են, բայց եղանակի ծառայությունը հայտնել է, որ ջրհեղեղի վտանգը նվազում է: 

Հանոյում Կարմիր գետի մակարդակը հասել էր վերջին 20 տարվա առավելագույն բարձրության, և հազարավոր մարդիկ տարհանվել են գետի մոտակա շրջաններից:

Ներկայումս Կարմիր գետի մակարդակը սկսել է իջնել, բայց Հանոյից հյուսիս գտնվող տարածքներում իրավիճակը դեռ լուրջ է։