Ռուսական լրատվամիջոցները հաղորդել են Ռուսաստանից վեց բրիտանացի դիվանագետների արտաքսման մասին՝ նշելով, որ այս դիվանագետների գործունեությունն ուղղված էր Ուկրաինայի դեմ պատերազմում Մոսկվայի հաջողությունը խափանելուն և սպառնում էր Ռուսաստանի անվտանգությանը, և հենց այդ պատճառով էլ ձեռնարկվել է այս քայլը:

 

Կրեմլի անվտանգության ծառայությունը ուրբաթ օրը հայտարարել է, որ Ռուսաստանում գտնվող վեց բրիտանացի դիվանագետ մեղադրվում է լրտեսության մեջ, և նրանց դիվանագիտական լիազորությունները չեղյալ են հայտարարվել:

 

Ռուսական պետական հեռուստատեսության հաղորդմամբ՝ Կրեմլի անվտանգության ծառայության ներկայացուցիչն ասել է, որ նրանք կարտաքսվեն Ռուսաստանից:

 

Կրեմլի անվտանգության ծառայությունը պնդել է, որ ձեռք է բերել փաստաթղթեր, որոնք վկայում են, որ այս մարդկանց Ռուսաստան է ուղարկել Մեծ Բրիտանիայի արտաքին գործերի նախարարության ստորաբաժանումը, «որի հիմնական խնդիրը Ռուսաստանի ռազմավարական պարտությունը պարտադրելն է», և նրանք ներգրավված են եղել տեղեկատվության հավաքման և դիվերսիոն գործունեության մեջ:

 

Այս քայլը ձեռնարկվել է այն բանից երկու օր անց, երբ ԱՄՆ-ն և Մեծ Բրիտանիան պարտավորվեցին Կիևին տրամադրել լրացուցիչ 1,35 միլիարդ եվրո ֆինանսական օգնություն, իսկ ուկրաինացի պաշտոնյաները կրկնեցին իրենց խնդրանքը՝ Արևմուտքի տրամադրած հրթիռներն օգտագործել Ռուսաստանի խորքում գտնվող թիրախների դեմ: