Հրավերները առաքվել են, պատասխանների հետ կապված ծանուցումներ կլինեն։ Այս մասին լրագրողների հետ զրույցում ասաց Մուշեղ Սրբազանը՝ անդրադառնալով Նիկոլ Փաշինյանի և իշխանության այլ ներկայացուցիչների մասնակցությանը Մայր տաճարի բացմանը։

Խոսելով վերանգորոգման ընթացքի մասին՝ Սրբազանը նշել է որ Մայր տաճարում ոչ մի փոփոխություն տեղի չի ունեցել․ «Ոչ մի սուրբ սեղան չի տեղաշարժվել, ընդհակառակը, ամրակայվել են և իրենց նախատեսված տեղում մնացել են»։

Նա նշել է՝ նման ծավալի ամրաշինական աշխատանքներ չեն եղել։

«Վերջին անգամ 1620-ական թթ․-ին Մովսես Տաթևացի կաթողիկոսի ժամանակ է եղել, հետագայում ևս այլ կաթողիկոսների ժամանակ վերանորոգումներ եղել են, բայց այսպիսի հիմնարար վերանորոգում իրականացվել է ներկայիս կաթողիկոսի՝ Ն․ Ս․ Օ․ Տ․ Տ․ Գարեգին Բ-ի օրոք»։

Հարցին՝ ովքեր են եղել Մայր տաճարի վերանորոգման աշխատանքների հովանավորները, Սրբազանը պատասխանեց․ «Հայտարարված էր համազգային հանգանակությունը, բայց այդ ընթացքում համավարակ և Արցախի պատերազմ եղավ, Հայոց Հայրապետը որոշեց, որպեսզի համազգային հանգանակություն չիրականացվի, որպեսզի այդ հանգանակությունները ուղղվեն Արցախ, Հայոց բանակ, կարիքավորներ, բռնագաղթվածներ։ Կան հիմնականում մեկ տասնյակ բարերարներ և համազգային հանգանակություն, որի մեջ եղել է հանգանակություն այն տեսքով, որ հավատավոր մի հայորդի խնդրել է իր ֆիզիկական ուժը որպես իր կողմից նվեր Մայր տաճարին, 1-2 օր Մայր տաճարում աշխատանքներ է իրականացրել, մաքրություն և այլն»,- ասաց Սրբազանը։