Շիական «Հեզբոլլահ» շարժման հատուկ գործողությունների հրամանատարության ղեկավար Իբրահիմ Աքիլը, որը ենթադրաբար եղել է Բեյրութի վրա իսրայելական հարվածի թիրախը, զոհվել է հարձակման հետևանքով, հաղորդում է Ռոյթերս գործակալությունը՝ հղում անելով աղբյուրներին։

«Հեզբոլլահի» բարձրաստիճան հրամանատար Իբրահիմ Աքիլը սպանվել է ուրբաթ օրը Բեյրութի վրա իսրայելական հարվածի հետևանքով», - ասված է հրապարակման մեջ։

Ավելի վաղ ականատեսները հայտնել էին Բեյրութի հարավային արվարձանում տեղի ունեցած հզոր պայթյունների մասին։ Զգալի վնասներ են հասցվել մի քանի բազմահարկ բնակելի շենքերի։ Իսրայելի բանակային «Գալեյ ՑԱԽԱԼ» ռադիոկայանը հաղորդել է, որ Բեյրութի վրա Իսրայելի օդային հարվածի թիրախը եղել է շիական «Հեզբոլլահ» շարժման բարձրաստիճան հրամանատարը։

Լիբանանի առողջապահության նախարարությունը ավելի վաղ հաղորդել էր, որ Բեյրութի հարավային արվարձանի վրա իսրայելական հարվածի հետևանքով զոհերի թիվը հասել է ութի, վիրավորվել է 59 մարդ։