Ամերիկյան ռազմածովային ուժերի «Հարի Թրումեն» ատոմային ավիակիրը դուրս է եկել Վիրջինիայի նահանգի Նորֆոլքի ռազմակայանից և ուղևորվել Մերձավոր Արևելք: Արմենպրես-ի փոխանցմամբ՝ այս մասին հաղորդում է USNI News-ը։

«Հարի Թրումենը» հրթիռային հածանավի և ավիակիր հարվածային խմբի երկու կործանիչների հետ միասին կտեղակայվի Արևելյան Միջերկրածովյան շրջանում` տարածաշրջանում ստեղծված ճգնաժամային իրադրության ֆոնին:

Ներկայում Մերձավոր Արևելքում՝ Օմանի ծոցի շրջանում, արդեն գտնվում է ամերիկյան ավիակիր հարվածային խումբը՝ «Աբրահամ Լինքոլն» ավիակրի գլխավորությամբ, որի կազմում կա երեք հրթիռային կործանիչ նավ։

Բացի այդ, Կարմիր ծովի շրջանում մարտական ​​հերթապահություն է իրականացնում ԱՄՆ ռազմածովային ուժերի «Ջորջիա» միջուկային սուզանավը, որը կարող է կրել մինչև 154 Tomahawk թևավոր հրթիռ, ինչպես նաև երկու հրթիռային կործանիչ նավ։

Պենտագոնի տվյալներով՝ ներկայում Մերձավոր Արևելքում գտնվում է շուրջ 40 000 ամերիկացի զինվորական և տասնյակ մարտական ​​ինքնաթիռներ։