ԱՄՆ նախագահ Ջո Բայդենը ելույթ է ունեցել ՄԱԿ-ի Գլխավոր ասամբլեայի առջև, որը, ինչպես ինքն է նշել, վերջինն է եղել պետության ղեկավարի պաշտոնում։

Ի թիվս այլ բաների, Բայդենն ասել է, որ Ռուսաստանի նախագահ Վլադիմիր Պուտինի մղած պատերազմը չի կարողացել հասնել իր նպատակներին, սակայն դա չի ժխտում Ուկրաինային աջակցելու անհրաժեշտությունը: Դահլիճում ներկա է եղել Ուկրաինայի նախագահ Վլադիմիր Զելենսկին։ 

«Պուտինի պատերազմը չի հասել իր հիմնական նպատակին։ Նա ձգտում էր կործանել Ուկրաինան, բայց Ուկրաինան դեռ ազատ է։ - ասել է Բայդենը,- «Նա ձգտում էր թուլացնել ՆԱՏՕ-ն, բայց ՆԱՏՕ-ն ավելի մեծ է, ավելի ուժեղ և ավելի միասնական, քան նախկինում, երկու նոր անդամներով՝ Ֆինլանդիա և Շվեդիա»:

«Բայց մենք չենք կարող թուլանալ»,- շարունակել է նա,- «Աշխարհն այժմ կանգնած է մեկ այլ ընտրության առաջ՝ մենք շարունակու՞մ ենք աջակցել Ուկրաինային՝ օգնելու նրան հաղթել պատերազմում, թե՞ հեռանում ենք և թույլ ենք տալիս վերսկսել ագրեսիան և ազգը ոչնչացնել»:

«Ես գիտեմ, թե որն է իմ պատասխանը. մենք չենք կարող հոգնել, չենք կարող թեքել մեր հայացքը, մենք չենք թուլացնի մեր աջակցությունն Ուկրաինային, քանի դեռ Ուկրաինան չի հասել արդար և կայուն խաղաղության», - ասել է Բայդենը։