23-ամյա Բերտա Շահրամանյանը նախորդ տարի Արցախում վառելիքի պահեստի ողբերգական պայթյունի հետևանքով կորցրեց ամուսնուն, ում հետ ամուսնացած էր ընդամենը 25 օր, երկու եղբայրներին ու հորը։ Այսօր նա ֆեյսբուքյան իր էջում գրառում է արել ընտանեկան մեծ կորստի մեկ տարելիցի առթիվ.

«Կորցնել ծնողիդ, կորցնել հարազատ եղբայրներիդ, կորցնել 25 օրվա ամուսնուդ։ Ու կորցնել բոլորին ՄԻԱՆԳԱՄԻՑ,մի ակնթարթում ու մի վայրկյանում։

Կորցնել՞ ամբողջ ընտանիքդ։ Չէ՛, չեմ լսել, կինոյում,հեքիաթներում,գրքերում միշտ էլ վերջում բարին ու լավն է հաղթում։

40 օրվա տանջալից փնտրտուքներից հետո կանգնեց կյանքս հուր հավիտյան։ Ցավ, որը երբեք չի սպիանալու, չի բուժվելու։ Կարծես թե 1 ամիս է դեռ ինչ կողքիս չեք,բայց արդեն 1 տարի։

Էնքան բան կա ձեզ պատմելու, հետ եկեք տղերք, ՀԵՏ։

Դաժան ու անարդար բախտ վիճակվեց ձեր Բերտային, ձեր տան միակ թագուհին ընդմիշտ անգույն ու սևավորված կլինի։

Կարոտս անասելի է, բառերս ու զգացմունքներս խեղդված են արցունքներիս մեջ։ Ատում եմ քեզ սեպտեմբեր,ատում եմ քեզ ամբողջ սրտով»։