Կառավարությունը 5 տարի ժամկետով Արմեն Գրիգորյանին հաստատել է Հայաստանի պետական տնտեսագիտական համալսարանի ռեկտորի պաշտոնում։ 

ԿԳՄՍ նախարար Ժաննա Անդրեասյանը ներկայացնելով Գրիգորյանին՝ ասաց, որ նա նոր մարդ չէ բուհում, եղել է ռեկտորի պաշտոնակատար և արդարացրել իրեն այդ ընթացքում։

Նորընտիր ռեկտորը շնորհակալություն հայնտեց վստահության համար՝ ասելով, որ ջանքերը կենտրոնացնելու է կառավարության սահմանած ռազմավարական թիրախներն ապահովելու, մասնավորապես, համալսարանը միջազգային վարկանիշային աղյուսակներում առաջ մղելու համար։

Սեպտեմբերի 6-ին տեղի էր ունեցել համալսարանի խորհրդի նիստը, և առաջադրված 4 թեկնածուից ընտրվել էր Արմեն Գրիգորյանը՝ 19 կողմ ձայնով։

Հիշեցնենք՝ Հայաստանի պետական տնտեսագիտական համալսարանի ռեկտոր Դիանա Գալոյանը հրաժարականի դիմում էր ներկայացրել մարտի 19-ին։