Միջազգայնագետ, Ամերիկյան հետազոտությունների հայկական կենտրոնի տնօրեն Սուրեն Սարգսյանն «Ինչու Փաշինյանն արհամարհեց Բայդենի «հրաժեշտի» ընդունելությունը» վերտառությամբ գրառում է արել։

Ըստ նրա՝ ընդունելությանը չմասնակցելն անհարգալից վերաբերմունք էր հեռացող նախագահի հանդեպ:

«Ինձ մոտ հարց է առաջացել, թե ինչո՞ւ Փաշինյանը չմասնակցեց Բայդենի կազմակերպած հրաժեշտի ընդունելությանը՝ Նյու Յորքում: Ըստ ընդունված կարգի, ԱՄՆ նախագահը ընդունելության է հրավիրում ՄԱԿ անդամ պետությունների ղեկավարներին, ովքեր մասնակցում են ԳԱ նստաշրջանին:

Այս տարի հարյուրավոր երկրների ղեկավարներ մասնակցել են այս ընդունելությանը, որը տեղի է ունեցել Մետրոպոլիտեն թանգարում՝ սեպտեմբերի 25-ին՝ երեկոյան ժամը 18:00-ին:

Այդ օրը Փաշինյանը հանդիպել է Էրդողանի հետ, սակայն Էրդողանը, ավարտելով բոլոր հանդիպումները, մեկնել է ԱՄՆ-ից՝ չմասնակցելով ընդունելությանը:

Կարծում եմ՝ այդ ընդունելությանը չմասնակցելն անհարգալից վերաբերմունք էր հեռացող նախագահի հանդեպ: «Մեկա դու գնացող ես» մոտեցումը սխալ էր:

Բայդենին պետք է հանդիպեր, թեկուզ կարճատև զրույց ունենար: Էլ չեմ ասում, թե անձամբ ինչ աննախադեպ աջակցություն է ստացել հեռացող Բայդենի վարչակազմից:

Հաջորդ կարևոր պահը. մեր նախկին դեսպաններն ու նախարարներն էլ կփաստեն, որ հեռացող պաշտոնյաներն իրենց գործընկերներին հարցնում են՝ «I have limited time left in office. What can I do for you?»:

Իհարկե, այստեղ ԱՄՆ-ից կարելի է ինչ-որ բան խնդրել և ստանալ, ինչպես հաճախ արել են աշխարհի տարբեր առաջնորդներ, այդ թվում՝ մեր նախկին երեք վարչակազմերի ներկայացուցիչները: Իհարկե, նման բաների մասին Մակունցը պետք է գլխի գցեր Փաշինյանին, եթե, իհարկե, տեղյակ է տենց բաներից»,- Facebook-ում գրել է Սարգսյանը։