Ադրբեջանն այնքան էլ հակված չէ ստորագրել խաղաղության պայմանագիրը, այսօր Ազգային ժողովում կառավարության հետ հարցուպատասխանի ժամանակ  հայտարարեց վարչապետ Նիկոլ Փաշինյանը։

«Այն, որ Ադրբեջանը նոր թեմաներ է բերում դաշտ, նշանակում է, որ այնքան էլ հակված չէ խաղաղության պայմանագիր ստորագրել։ Եվ մեր քաղաքական խնդիրն է փոխել ընդհանուր միջավայրը և մթնոլորտը, որպեսզի խաղաղության պայմանագրի ստորագրումը դառնա իրատեսական»,- խորհրդարանի ամբիոնից հայտարարեց նա։

Փաշինյանն ընդգծեց, որ  անկախ նրանից, թե ինչ է ասում կամ չի ասում Ադրբեջանը, Հայաստանն իր ռազմավարությունը չպետք է փոխի, այլ՝ պետք է հեռևողականորեն աշխատեն խաղաղության պայմանագրի ուղղությամբ։

Երևանն ու Բաքուն հայտարարել են, որ խաղաղության պայմանագրի մոտ 80 տոկոսի շուրջ ընդհանուր հայտարարի են եկել։ Երևանն առաջարկում է ստորագրել համաձայնեցված դրույթները, ունենալ հիմնարար փաստաթուղթ, որից հետո շարունակել քննարկումներ մնացած հարցերի վերաբերյալ։