«Երեկ,  գիշերվանից սկսած իրավապահ կոչվածները տարբեր հալածանքների էին ենթարկում մեր շարժման երիտասարդներին, այսօր էլ փողոցից առանց պատճառի կալանել, տարել են այն մեքենան, որի վրա դրված էին մեր երաժշտության սարքերը»,- Հանրապետության հրապարակում տեղի ունեցող հավաքի ժամանակ լրագրողների հետ զրույցում ասաց  Բագրատ Սրբազանը։

Դիտարկմանը, որ այսօր ԱԱԾ–ը հայտարարություն էր տարածել և կոչ արել հավաքի մասնակիցներին զերծ մնալ հակաօրինական գործողություններ կատարելուց, Բագրատ Սրբազանն ասաց.

«Այդ հայտարարությունն ամբողջությամբ վերաբերում է այսօրվա իշխանությունների հակասահմանադրական, հակապետական գործունեությանը։ Վերջապես ԱԱԾ–ը կարողացավ ուժ գտնել իր մեջ և այդ հայտարարությունն անել։ Մինչև հիմա ազգային անվտանգությունը պետք է ձերբակալած լիներ այդ մարդկանց»։ 

Անդրադառնալով Հանրապետության հրապարակում տեղի ունեցող հավաքին, Սրբազանը նշեց, որ քանի գոյություն ունի այս չարիքի իշխանությունը, իրենց պայքարը շարունակվելու է։

«Թե ինչքան կտևի դա, կախված է նրանից թե որքան արդյունավետ կգործենք մենք և ինչ կերպով կհասնենք մեր նպատակին»,- ասաց Սրբազանը: