Իսրայելական զորքերը շարունակում են ցամաքային գործողությունը Լիբանանի հարավում՝ զուգահեռաբար հրթիռային հարվածներ հասցնելով «Հեզբոլլահի» ենթակառուցվածքների օբյեկտներին մայրաքաղաք Բեյրութում, որը, ինչպես հաղորդում է BBC-ի թղթակիցը, «վերջնականապես վերածվել է մարտական գործողությունների գոտու»։

Շաբաթ առավոտյան իսրայելական հրամանատարությունը հայտարարեց «Հեզբոլլահի» «պայթուցիկով լի» զինապահեստների ոչնչացման մասին, որոնք տեղակայված էին «լեռներում, թփուտներում և խիտ կառուցապատված շրջաններում»։ Վերջիններիս բնակիչներին նախապես զգուշացրել էին հարվածների մասին՝ խաղաղ բնակչությանը տալով ժամանակ տարհանվելու համար։ Սակայն, ինչպես հաղորդվում է՝ այս տարածքը լքել ցանկացողները վաղուց փախել են այնտեղից դեպի հյուսիս՝ Սիրիա։

ՄԱԿ-ի տվյալներով, «իսրայելական օդային հարվածների հետևանքով» Լիբանանից Սիրիա է հոսել փախստականների հոսք, որը գնահատվում է 200-300 հազար մարդ։ Ուրբաթ երեկոյան իսրայելական ավիացիան հարված է հասցրել երկու երկրների միջև սահմանի հատման հիմնական կետին՝ փաստացի փակելով ավտոտրանսպորտի մուտքը. այժմ սահմանը կարելի է հատել միայն ոտքով։

Իսրայելական զինվորականները նաև հայտարարել են, որ «ոչնչացրել են «Հեզբոլլահի» ահաբեկիչների կողմից օգտագործվող թունելների հորերը» սահմանամերձ շրջաններում՝ միաժամանակ սպանելով տասնյակ զինյալների, և քանդել են երկրի հարավում գտնվող մզկիթներից մեկը, որը խմբավորումն իբր օգտագործում էր որպես հրամանատարական կենտրոն։