ՀՀ Հատուկ հանձնարարություններով նախկին դեսպան Էդմոն Մարուքյանը ֆեյսբուքյան իր էջում տեսանյութ է հրապարակել՝ մանրամասներ ներկայացնելով, թե ինչ էր կատարվում 4 տարի առաջ այս օրերին Արցախում։

Մարուքյանը խոսել է Շուշիի մշակույթի տան ռմբակոծության մասին, երբ տասնյակ ոստիկաններ զոհվեցին:

«Ոստիկանության բազմաթիվ ներկայացուցիչներ հավաքված էին Շուշիի մշակույթի տանը, շատ պարզ էր, որ օդային հսկողություն կա և Ադրբեջանի ռազմական ղեկավարությունը, երբ բոլոր ոստիկանները մտել են մշակույթի տուն, ռմբակոծում է այն։ Այդ կադրերը հայտնում են սոցցանցերում և խուճապային տրամադրություններ են առաջանում։ Մենք գտնվում էինք Արցախում։ Հոկտեմբերի 5-ին որոշում են վերադառնալ և կիսվել տպավորություններով։ Արտակարգ դրություն էր, պետական քարոզչությունից այլ բան մենք չէինք կարող ասել, օրինակ` պարտվում ենք, որ խայտառակ վիճակ է ռազմաճակատում։ Վերադարձի ժամանակ էլ մենք գրեթե ռմբակոծության տակ ենք վերադարձել։ Հիշում եմ, որ կիսաանտառային, գետի միջով ճանապարհներով դուրս եկանք Ստեփանակերտից և ուղևորվեցինք Երևան։ Ես իմ ամենանեղ շրջապատում ասել եմ, որ պարտվում ենք և վատ է վիճակը։ Այստեղ տեսնում եմ, որ մարդիկ ոգևորված են խոսում են հաղթանակի մասին, ոչ ադեկվատ իրավիճակ»,- նշել է Մարուքյանը և շեշտել, թե հիմա էլ է նույն իրավիճակը, մարդիկ ուզում են միայն լավ լուրեր լսել։

«Այսօր էլ մարդիկ չեն ուզում լսել ադեկվատ բան, լսում են նրանց, ովքեր հույս են վաճառում հերոինի նման։ Մարդիկ չեն ուզում իմանալ մարտահրավերները և չեն ուզում իմանալ՝ ինչ անել, որ չլինի։ Ժողովուրդ, դուք ուզում եք, որ ձեզ խաբեն»,-ասել է Մարուքյանը։